समयको तस्वीर

यौटा ख्याउटे झिँगेमाछो
ठूला माछाहरूको अगाडि
हात थापेर
न्याय मागिरहेछ !
न्याय
आँखामा कालो पट्टि बाँधेर
दिव्यदृष्टिको हवाला दिंदै
लमतन्न र लम्पसार
तराजुमा झुन्डिरहेको छ !
शक्ति –भक्ति भए हुन्छ !
भक्ति –शक्ति भए हुन्छ !
शक्ति र भक्ति दुवै नभएका
झिँगेमाछाको पक्षमा
न ठूलो माछा छ
न न्याय छ
न तराजु छ
छ त केवल उही दृश्य छ
सदियौंदेखि पूर्ववत्–
यौटा झिँगेमाछो
ठूला माछाहरूको अगाडि
हात थापेर
न्याय मागिरहेछ !