नेपाली हास्यव्यङ्ग्य अनलाइन पत्रिका

दुई जीब्रे प्रजातन्त्र

लालुको जस्तो प्रजातन्त्रको
आलुको जस्तै भएछ भाउ ।
हात्तीका दुई थरी दाँत भएझैँ
एउटा देखाऊ, अर्काले चपाऊ ।

घाउका टाटाहरू

विकासको चार्ट निरन्तर उकालिन्छ
जताततै भत्केका बाटाहरू छन् ।
राजनैतिक प्रतिद्वन्द्विताले मुलुक चौपट भैसक्यो
जनताका हृदयमा घाउका टाटाहरू छन् ।

समस्या

विचारको आगो लगाएर
आस्थाको घरमा
हामी पानी नखोजेर
साइत पर्खिरहेछौं –
‘आग लागी झुपडी डेढ घडी भद्रा ।’

रूख

हाँगाबिँगा काटेर
जरा उखेलेर
तमासा देखाउँदै
ठुटे रूखमा
पानी सिँचन गर्दैछौं– हामी ।
मन्थली, रामेछाप