नेपाली हास्यव्यङ्ग्य अनलाइन पत्रिका

यो बोरा तानातानको कथा हो
भव्य उज्याला शहरहरू भित्रका
अँध्यारा गल्लीहरूको
अन्धा शहरका पखालहरू
तिनै पर्खालको फेदमा
लडिरहेछन् जीवनहरू
दिन ढलेपछिको कथा हो यो
पर्खालको फेद एक लस्करमा
ढल्छन् ती लाचार जीवनहरू
क्षत बिक्षत सम्हालेको
एउटा बोरा बोकेर
रात बढ्दै जान्छ
बोरा ओढ्ने निदाउँछ
छेउको जीवन पर्खी रहन्छ
जब साथी निदाएको थाहा पाउँछ
बिस्तारै आफूतिर बोरा तान्छ
अनि ऊ पनि निदाउँछ
अर्काे पुन पर्खिरहेको हुन्छ
फेरि ऊ पनि आँखा चिम्लन्छ
निन्द्रा क्रमश सरिरहेको हुन्छ
मानौं बोरा निदाउने यन्त्र बन्छ
महाजनको बार्दलीबाट
हेरिरहन्छ एउटा कुकुर
मखमली कम्बलभित्र गुट्मुटिएर
यी जीवनहरूको यो अनौठो दृश्य
हर शहरका गल्ली र पर्खालहरूमा
भौतारी रहेछन् यी फाटेका जीवहरू
जिस्क्याई रहेको भविष्य साथमा
एक कहालीलाग्दो रात बनेर
महिना बित्छ बर्ष बित्छ
महाजनको कुकुरको कम्बल फेरिन्छ
तर बोरा तानातान दोहोरी नै रहन्छ
बोरा निरन्तर सरिरहेको हुन्छ
जीवनहरू सुतिरहेका हुन्छन्
दुखी जीवनको मिठो सपना बनेर ।
हाल– जर्मनी