नेपाली हास्यव्यङ्ग्य अनलाइन पत्रिका

नयाँ शहरमा नयाँ फास्टफुड
ज्ञात–अज्ञात अनुहारमाथि
टाँसिएको छ मेनु–
सहिद मञ्चको भित्तामा
बनमारा झारको फ्लेवरमा
ब्रोईलर विचारको हट सुप !
उधारो आश्वासन र सपनाहरू
विचारको फ्यूजन र कन्फ्यूजन ।
कमरेड !
तिमीले दुनामा दिएको
ब्रोईलर विचारको हट सुप
कुनामा बसेर जतिले पिए–
बकबक गर्छन् एलर्जी
काउसोको कमाल
कन्याउँछन् ठाउँ कुठाउँ
आफूले बोलेको
बुझ्दैनन् आफैँ ।
कमरेड !
घण्टाघरले घण्टी हानेको हान्यै छ
तम्तम्याईलो खँड्कुलोमा
ब्रोईलर विचारको हटसुप
उम्लेको उम्ल्यै छ
बाफ बनेर फैलिरहेछ
आतङ्कित फ्लू !
कमरेड !
गुन्द्रीमा बसेर
गुन्द्रुकको स्वाद लिनेहरू
एकोहोरो हेरिरहेछन्
र, दोहोरो भनिरहेछन्
वाफ रे ! वाफ…
ब्रोईलर विचारकोे वाफ !
उड्यो फोकाझैँ
र, हेर्दा र्हेर्दै–
नपुग्दै धरहरामाथि
प्वाट्ट फुटेर विलायो
महाभोजका रमिते माथि ।
अन्नपूर्णपोष्ट दैनिक, २८ चैत २०७१