फित्काैली डटकमसम्पर्क हुन सकेन
समयको छलाङसँगै थरिथरिका भाँडाकुँडाले पनि सकीनसकी ठोस्सिँदै न ठुस्सिँदै फड्को मारेकै छ । उहिलेका भाँडा र अहिलेका भाँडाले फाट्टफुट्ट मेल खाए पनि विद्युतीय भाँडाका गर्भाधान भएपछि निर्जीवजस्ता लाग्ने भाँडा पनि सजीवजस्तो क्वाँर्र न कुरर्र बोल्न थालेपछि हामी दङ्गदास परेर भुर्र उडौंजस्तो पो हुन्छ त ! बीसौँ शताब्दीले बेस्करी क्रान्ति गरेकै हो भन्ने कुरामा कसैले जतिसुकै आहारिस देखाएर पनि छिप्न सक्दैन । जस्तो कि रेडियो एउटा सुन्ने भाँडो, टेप रेकर्ड अर्को कुरा जम्मा गर्ने र ओकल्ने भाँडो, टेलिभिजन अर्को तिरमिराउने, हेर्ने भाँडो, टेलिफोन अर्को दूर देशमा गफ गर्ने भाँडो । जे होस् जसले जुनी दिए पनि यी विद्युतीय भाँडाहरू भाँडाकै रूपमा प्रयोग भए भने त मज्जा हुन्छ मनभरि । जब त्यही भाँडो घाँडो हुन्छ, तब त्यो आफ्नै गलामा झुण्डिएको एक धार्नीको गाँडोजस्तो हुन्छ । यस्तै छ अचेल नेपालीले पाएको नयाँ टिन्टिनाउने भाँडोको खबर ।
बेलामा भाँडो पाउनेहरू कोठाभरि, चोटाभरि, बाटाभरि भनांै या चुठ्ने बेला लोटाभरि हर्षले गद्गद् भएर आटो पाकेझैँ फतफत पाक्दै मनका काउकुतीलाई कोट्यायौँ पेटैभरि । सुकुमार औंला चुम्बनले चुइँकियो दुईचार दिन गजबसँग मनपरि । त्यसपछि त फोनभित्र कोच्चिएर बसेकी कम्प्युटर बहिनीको सुमधुर स्वरले भरिपूर्ण भयो यो फोन । जब उनले सम्पर्क हुन सकेन भन्छिन्, तब उनीसँग भेट्ने इच्छा जाग्छ, उनको खाप्चो हेरूँ–हेरूँ लाग्छ, थुतुनो जोरूँजोरूँ लाग्छ । बोली त यति मीठो छ भने उनको रूप झन कम मोहनीमय होला ? सायद सुटुक्क चिटिक्क परेर बसेकी होलिन् प्याट्ट प्रेमीलाई कानैमा ट्वाक्क हान्ने तयारीमा । जति पटक नम्बर हाने पनि सुटुक्क भन्छिन् ‘सम्पर्कै हुन सकेन’ एकक्षण पछि प्रयास गर्नुहोला ।
एकक्षण मात्र हो र ? दुई क्षण, तीन क्षण, चार क्षणसम्म प्रयास गर्दा पनि सम्पर्क हुँदैन । बरू फेरि सुमधुर स्वर सुनिन्छ ‘सम्पर्क हुन सकेन, एकक्षण पछि प्रयास गर्नुहोला ।’ दिनैभरि गरे पनि उनको निम्ति एकक्षण भइरहन्छ । यसरी पटकपटक दोहो¥याएर त्यही भनिरहनुभन्दा सम्पर्क नहुँदा बेर मसँग मीठा मीठा मज्जाका गफ गर्नुस् भनेर रल्ल पारिदिए पनि त हुन्थ्यो । सङ्गीतमय बोलीले लठ्ठ पारिदिए त शोक न सुर्ता भोक न भकारी घन्टौंसम्म डकारी डकारी गफ गर्ने थिएँ । कोही वाक्क र दिक्क हुने थिएन । फकाई फुल्याई सारा काम रेल्याइ दिए पनि फरक पर्ने थिएन । गफका गजुर निकालेर जति गलहत्याइदिए पनि हुन्थ्यो ।
हुन त कति जनासँग होला त सम्पर्क ! त्यस्ती मृदुवाणी युक्त, मधुर स्वरकी धनी यी बैनीको पछाडि त बडेमानका हजारौँ हजार, खाई नखाई, भ्याई नभ्याई सौन्दर्य वर्णनमा मस्त होलान्, सर्वसाधारणसँग केको सम्पर्क होस् हँ ? तर जे होस् बानीचाहिँ गजबै रै’छ । सम्पर्क नहुने तर बोलिरहने, स्रोत प्राप्त नहुने, तर जिस्काइरहने, नम्बरै नमिल्ने, तर कराइरहने यी बहिनीको त सम्पर्कै हुन सकेन, मेरो पनि दजर्नौंं पटक प्रयास गर्दा सम्पर्क हुन सकेन । म त आत्तिएँ, छट्पटाएँ, मर्न थालेँ ल भन्नुस्, यी कसकी छोरी होलिन् हँ ? म के गरूँ सम्र्पक हुन सकेन । ल तपाईंले भेटेमा सम्पर्क गर्ने ठेगाना यही तल झुण्ड्याइदिएको छु, तु तानेर दिनुस् ल ! अस्तु
रोल्पा
