नेपाली हास्यव्यङ्ग्य अनलाइन पत्रिका

यो संसारमा तरुणी भएर जन्मिनु नै गाह्रो छ । कुनै तरुणी देख्ने साथै बाह्र हात टाढ़ा बसी घुटुक् घुटुक थुक निल्ने एउटा देशान नै चलेको छ हाम्रो गाउँमा । यो देशान अरु गाउँ-घरतिर पनि नचलेको नहोला । लु युवकहरू ता भए भए लठेब्रा धरि पो तरुणीहरू देखे तीन ठुन्का परेर क्यै राख्दैन । अझ उनीहरूसित जिस्किए दिए… बोलिदिए… वाटस्एपको नम्बर माग्नु मात्र होइन फेसबुक छ भनी सोध्न छोड़्दैनन् । त्यो ट्याक-ट्याके फोनमा के को फेसबुक, के को वाटसएप । तपाईको गाउँमा पनि यस्ता लठेब्रे हिरोहरू होलान् ।

हाम्रो गाउँलाई पनि यो देशानले नभेटेको होइन । हाम्रो यो गाउँमा एकजना फुर्के न फुर्के दाजु छन् । हामीले उनलाई झपटबहादुर नाममा बोलाए पनि गाउँमा उनको चुरीफुरी चर्तीकला देखेर सबले उनलाई फ्वाँके नाममै चिन्छन् । तर उनले थाहा पाउँछन् भनेर उनको नाम हामीले एफके (फ्वाँके) भन्ने गर्छौं । बिहे गरेको भए पनि अपरिचित तरुणीहरूलाई अविवाहित नै भन्ने गर्छन् । जससलाई देखे पनि कण्ट्याक्ट नम्बर, वाट्सएप नम्बर र फेसपुकको प्रोफाइल मागेर नपाइञ्जेल पछि छोड़्दैनन् । फ्रेण्ड रिक्वेष्ट पठाउनमा एक नम्बर । बिहे भइसकेको छ… बुड़ी त थपना मात्रैको रुपमा । बुड़ी कति सरल, सोझी छिन् । उनी छक्का पञ्जा केही जान्दिनन् विचारा । पतिभक्ति । तीज व्रत पालन गरेर लोग्नेको दीर्धायुको कामना गर्छिन् भोकै बसी बसी ।

यी एफके दाज्यू भने आफ्नी बुड़ीप्रति एकदमै लोयल छैनन् । कुनै पूजा-पर्व, पुराण, सत्यनारायण पूजा वा बिहे बुटुलमा उनको मार्केट डाउन हुन्छ भनी एफके दाज्यूले उनकी बुड़ीलाई कहिल्यै आफूसँग लाँदैनन्… । एफके दाज्यू मान्छे कतिसम्म चलाक छन् भने उनकी बुड़ीको नाम चरीमाया हो । तर गाउँ-घर वा साथीभाइहरूमाझ आफ्नी बुड़ीको नाम चरीमाया भन्न लाज लागेको उनकी बुड़ीको नाम चञ्चला राखिदिएका छन्… । अहिले एफके दाज्यूकी बुड़ीलाई चञ्चला भाउज्यू भनी सबैले चिन्न थालेका छन् । तरै पनि उनकी बुड़ी आफ्ना बुड़ा जहाँ जहाँ जान्छन् त्यतै त्यतै जान्छन् । एफके दाज्यू बिहे-बुटल, मरौ-परौ, व्रतबन्ध, पूजा कतै छोड़दैनन् … तर त्यहाँ तरुणीहरूको भीड़ हुनैपर्छ । हाम्रा एफके दाज्यूलाई राम्री-राम्री तरुणी बाहेक जे जस्तो भए नि चल्छ । बस तरुणी हुनुपर्‍यो । आलु हेरेर प्याजको दाम तिर्ने भए पनि चल्छ । बाऊ..मलाई त्यै केटी चाहिन्छ भन्ने रक गीत र एफके दाज्यूको कुरा ठ्याक्कै मिल्छ ।

हाम्रो गाउँमा धनबहादुर काकाकी छोरी धनसरीको बिहे थियो । धनसरी हाम्री साथी । त्यसले हामीलाई काम सघाउन, निम्तारुहरूलाई याद गर्नु भनी बिहानै बोलाएकी थिई । हामी तान चारजना कथा मिल्ने साथीहरू धनसरीको बिहेमा बिहानै पुगेका थियौँ । त्यहाँ हामी इत्रिँदै, ठट्टा गर्दै आनन्द उपभोग गर्नमै व्यस्त थियौंं । साँझ परेपछि निम्तारुहरू आउन थाले । भाबर गर्मी । तर .यस्तो भाबर गर्मीमा पनि एफके दाज्यू टाई सुटमा बिहे थलोमा आइपुगे । यत्रो विशाल जमघटमा टाई सुट लाउने उनी मात्र थिए । उनको ड्रेसप हेर्दा अरुको तुलनामा उनलाई बाख्राहरूमाझ सुङ्गुरजस्तो देखिएको थियो । आफ्ने सुट आफै हेर्छन् । टाई तानेर मिलाउँछन् । बेहुलासित हात मिलाए… बेहुली धनसरीले नमस्कार गरिन्… तर उनले फुर्के भएर हात मिलाए । धनसरीलाई अपठेरो लागेको हामी बुझ्दैछौं । धनसरीको हात समातेर हल्लाको हल्लाकै छ । भिडियोग्राफरलाई बोलाएर फोटो खिँच्न लाइरहेका छन् । पछि धनसरीको कानमा कुनि के के भने । धनसरीका बुड़ा हाम्रा भेनाज्यू अग्नि शर्मा भइसकेका थिए । उपहार दिन आएका अतिथिहरूको भीड़ भइसक्यो । एफके दाज्यू धनसरीको हात अठ्याउनमै व्यस्त ।

कुन कसो गरेर धनसरीले एफके दाज्यूको हात फ्याँकिदिई । त्यतिबेला पो उनले उनको चम्चेलाई उपहार मागेर धनसरीको हातमा थमाइदिए । खबरकागजमा पोको पारेर उपहार धनसरीलाई हातमा थमाएर उनी खानाको टेबलमा आए । बिहे सकेर राती हामी केटीहरू मिली सबैभन्दा एफके दाज्यूकै उपहार हेर्‍यौं । उपहार गतिलो होला भनेको त उगाल आइसकेको काँसको थाल रहेछ । यो उगाल आइसकेको काँसको थाल देखेर मनमाया अत्तालिई अनि केही नहेरे एकै श्वासमा बोली- अप्पुई.. यो काँसको थाल त हामीले हाम्री बजूको अन्त्येष्टि क्रियामा सतपाल बाजेलाई दान दिएको । यो मोरोले यहाँ पो लिएर आएछ ।

क्यापटन काकाले पनि हेरिरहेका थिए । उनी हाम्रो छेउमा आएर भने- यो एफके यस्तै हो । यसका बाउले बिहेबटुल मरौपरो न्वारानमा पाएका सामानहरू यसरी नै लगेर उपहार दिन्छ । यसले बाउको सिम कार्ड चलाएर गाउँको भयङकर हुन चाहन्छ ।

डोमा अलिक छुच्ची । प्याच्चै भनि हाली- यो एफकेलाई एफके होइन काँसको थाल (के.टी) भन्नुपर्छ । धनसरीको बिहेकै दिनदेखि एफके नाम परिवर्तन भएर काँसको थालमा परिणत भयो । त्यसपछि खाना खाने ठाउँमा पुगे । खाना थाप्नेहरूको लम्बेतान लाइन देखेर हरेश लाग्यो काँसको थाल उर्फ के . टी खाना थाप्ने लाइनबाट निस्केर चारैतिर हेऱे उनले । बाबुको सम्पत्तिले किनेका गाड़ी अलि पर सारे जस्तो गरी बाहिर निस्किँदा जन्ती आएकी एकजना महिलासित परिचय गर्न गए । एफ के दाजु भनूँ वा काँसको थाल दाजु कुनै पनि तरुणीसित परिचय साट्नमा माहिर छ । दाजु मुसुक्क हाँस्दै नमस्कार गर्छन् । ती महिलाले पनि नमस्कार फर्काउँछिन् । परिचय मात्र होइन उनले ती महिलाको नाम, कण्ट्याक्ट नम्बर र वाटसएप नम्बर मागेका देखिरहेछौं हामी ।

खानाको लाइन सामान्य कम्ति भएपछि एफके दाज्यू प्लेट लिएर गई खाना थाप्छन् । दाजु भोकले पागल भएको पनि बुझियो । गाउँमा हुने बिहे बटुलमा गाउँका कसैले पनि घरमा खाना नबनाउने बानी परेको टोलीमा हाम्रा एफ के दाजु पनि पर्छन् । भात थाप्न मात्र के लागेको अघि बाहिर देखेका तरुणीले पो खाना बाँड़्दैरहिछन् । एफ के दाजु ती तरुणीलाई देखी लाजले तीन ठुन्का पर्छन् । लाजले मात्र होइन आफ्नो पर्सनालिटी देखाउने निहुँमा थोरै मात्र भात थापेर भलादमी जस्तो भई खान बस्छन् । लु पऱ्यो फसाद । अब एफ के दाजुले अघाइञ्जेल खानु नपाउने भयो । स्वाङै पारेर दाजुले थोरै मात्र खाना कुर्सीमा बसी खान थाले । एफ के दाजु हँदुवा मान्छे । बिरालोले नाँघ्न नसक्ने भातको राश हुसर्छन् । तर आज पर्‍यो फसाद । तर ती तरुणीको छेउमा थोरै खाएर आफ्नो भद्रता र महान रुप देखाउन त्यति खाना लिनु आँटै गरेनन् ।

उनको आँखा भातको प्लेटमा होइन ती तरुणी दिदीकै तिर छ । कसो कसो गर्दा ती तरुणी दिदीले पनि एफ के दाजुलाई हेर्छिन् । उनको आँखा जुझ्छ । दाजु मक्खै पर्छन् ती तरुणी मेरो मुठीमा आइन् भनेर । एफ के दाज्यूले अब ती तरुणीसित बात मार्ने, बिग टक गर्ने सुर कस्न मात्र के आँटेका थिए… अचानक एकजना वृद्ध महिला एई तँलाई बाबाले बोलाउँदैछन् भनिन् । तरुणीको पहिरन देखेर एफ के दाजु मक्खै परिसकेका थिए । यो उनको ह्याबिट नै हो । तरुणीले लाएकी सन ग्लास देखेर एफ के दाजु भुतुक्कै भइसकेको थिए । वृद्धा पछि पछि तरुणी अघि बढ़्दो कोनि कसो गरेर ती तरुणी दिदीले आँखाबाट सन ग्लास निकाल्छिन् । सर्वनाश… ती तरुणी दिदीले घाम छेक्नलाई होइन तर उनको फुला परेको एउटा आँखा छोप्नलाई पो सन ग्लास लिएकी रहिछन् भन्ने बुझ्न एफ के दाजुलाई कुनै गारो परेन ।

तरुणी दिदीको फुला परेको आँखा देखेर एफ के दाजुको सपना चकनाचूर भयो । विस्वाद मानेर गाड़ी लिएर घरतिर लागे । बेलुकी दुलही अन्भाउने समयमा फेरि अर्कै टाई सुटमा आए बिहा भए ठाउँमा । बल्ल बल्ल पाएका पनि फुला परेको आँखाले उनको इच्छा सर्वनाश पारेपछि अब अर्को शिकारमा उनी फेरि बिहा भए ठाउँमा आएका हुन् भन्ने कुरा सबैले बुझे । बाबुको पैसाको तुजुकले एफ के दाजुलाई गाउँमा सबैले नै मान्थे देखावटी रुपमा भए पनि । धनसरीकी आमा-बाबाले उनलाई आदरसाथ कुर्सीमा बसाए । गजक्क भई बसे उनी । तर उनको मन कहाँ मान्छ र..जहाँ तरुणी हुँदैन त्यहाँ उनी बस्दै बस्दैनन् । उनले उनको गिद्दे नजर चारैतिर डुलाए । बल्ल बल्ल उनको नजर एउटी गतिलो औरत उनको नजरमा पर्‍यो । आफै गएर परिचय साटासाट गर्छन् । दुइवटी नानीका आमा । तर पनि एफ के दाजुलाई केही फरक पर्दैन । उनलाई त जस्तै औरतसित टाइम पास गर्नु पाए भैगयो ।

ती औरतसित मस्त भएर गफिन थाल्छन् हाम्रा गाउँका एफ के दाजु । उनले ती औरतलाई आफू कुनै सरकारी अफिसका अफिसर हुँ भनी हावा पिट्न थाले । हाम्रो गाउँकी अचला दिदीलाई पनि यस्तै कुरा गरेर हावा पिटेका हुन् । एक दिन अचला दिदी उनको अफिस पुग्दा साधारण प्यून रहेको थाहा पाइन् । अचला दिदीलाई देखेर हत्त न पत्त अफिसको खाली टेबलमा बसी के के लेख्न थालेको जस्तो गरी अचला दिदीको आँखा छल्ने प्रयास गरेका कुरा अचला दिदीले अस्ति मात्रै मलाई सुनाएकी । एफ के दाजुजस्ता ढँटुवारेलाई यी सबको कुनै वास्ता छैन ।

ती औरतसित फोन नम्बर वाट्सएप नम्बर मात्रै होइन उनको प्रोफाइल हेरी फ्रेण्ड रिक्वेष्ट पठाइ पनि हाले । निकै लामो गफ चल्यो ती दुइको । बेहुलीलाई ससुराली लाने संमय भयो । रुवाबासी चल्यो । ती औरतले एफ के दाजुलाई विदा मागिन् । दाजुलाई खल्लो लाग्नु स्वाभाविकै हो । दुइ हात जोर्दै म कल गर्छु नि समेत भने । ती औरतले अस्वीकार गरिनन् । औरत अलिक परतिर मात्र के पुगेकी थिइन्… गाउँकै एकजना बहिनीलाई अँगालो हाले । बिहेमा जन्ती आएका सम्पूणर् तरुणीहरू एफ के यो करतुत देखी तीनछक्क परे पनि गाउँकाहरूलाई भने केही जस्तो लागेन । तरुणीहरूप्रतिको यिनको आशक्ति देख्दा देख्दा वा सुन्दा सुन्दा गाउँका सम्पूणर् औरतहरू थेत्तर भइसकेका छन् ।

एफ केको श्रीमती पनि त्यहाँ आइपुगिन् । एफ के दाजु मक्ख परेका अघि गफिएको औरतलाई नमस्ते गर्दै भनिन् , काकी । ती काकी त एफ के दाजुकी श्रीमतीकी काकी पो रहिन्छन् । ती औरत उनको काकीसासु पो रहिछन् । हाम्रा एफ के दाजुलाई केही फरक पर्दैन । के आफन्त के पराया । मलाई त्यै केटी चाहिन्छ भने जस्तो उनलाई केटी भए पुग्छ । काकीसासू परेकीले एफ के दाजुले नचाहँदा नचाहँदै पनि भूइँ सोरेर प्रणाम गर्न वाध्य भए । दाजु यसपाली चाहिँ पक्कै पनि हाँगोबाट खसे झै नै भइसकेका थिए । एफ के दाजुले यस्तो कदम कहिल्यै उठाउँदैनन् भन्ने गाइँगुइँ सुनियो ।

जे होस्. तपाईको समाज, गाउँ-घऱतिर पनि हाम्रा स्त्रीलम्पट एफ के दाजु होलान् । आफ्नो र पराया नचिन्ने एफ के दाजु पनि होलान् । यस्ताहरूसित होसियार बसौं । अब तपाई हाम्रो समाज एफ के दाजुजस्तो आदत भएका व्यक्तिहरूबाट जोगिनुपर्छ । यस्ता व्यक्तिहरूको चङ्गुलमा पर्नु हुँदैन । हाम्रो समाज गाउँघरका तरुणीहरूलाई जागरुक गरौं । सुन्दर समाज बनाऊ । चेलीबेटीलाई सम्मान दिन सकौं । होसियार. सावधान ।

हाम्रा एफ के दाजु तपाईको गाउँ घरतिर पनि चोर स्याल जस्तो पस्लान् । सोझो भद्रा भएर बस्लान् । आफ्नो गाउँ घरमा गरेका करतुत फेरि नदोहोर्‍य़ाउ़लान् । तर लागेको बानी कसले छोड्ने  ??

०००
खोलाचन्द फाप्री, जलपाइगुड़ी (भारत)