नेपाली हास्यव्यङ्ग्य अनलाइन पत्रिका

ओ टाउकेहरू !
तिमी ज्याक डेरिडा !?
विनिर्माण गर ।
जताततै भाँड गर ।
पहिचानका नाममा
जातीय
एकता भत्काऊ !
संविधानका नाममा
धार्मिक सहिष्णुता
भत्काऊ ।
स्वाभिमानका नाममा
सीमानाका
पिल्लर भत्काऊ ।
उत्तर आधुनिकताका
नाममा
मठ मन्दिरहरू भत्काऊ
गुम्बा, मस्जिदहरू भत्काऊ ।
यस वापत
युरो मुद्रा कमाऊ र
विदेश लाँदा
साट्नुपर्छ ।
बैंकमा राख्दा
श्रोत ढाँट्नुपर्छ ।
बोरामा खाँद
र देशलाई कङ्गाल बनाऊ ।

धर्म निरपेक्षताका
नाममा
तोड शिव
र पारुहाङका सालिकहरू
आस्था र
विश्वास भत्काऊ
फोड पृथ्वीका
सालिकहरू र
पुर्खाको
इतिहास भत्काऊ ।
साहित्य र
कला भत्काऊ,
लोक भाकाका
गला भत्काऊ ।
र रिमिक्स बनाऊ ।
फुटाऊ
मादल, मुर्चुङ्गा र सारङ्गीहरू
टुटाऊ
मारुनी र हुड्काका
भाव भङ्गीहरू ।
यसबापत
डलर, पाउण्ड र
भारु आउँछ होला
डबल हर्स, टकिला र
दारु खाऊ ।

तिमी टाउकेहरू !
भर्ना गर
लाउकेहरू !
उखेल वरपिपलका बोटहरू
काटेर रित्याऊ
कामधेनुका गोठहरू ।
थप
हाम्रा जीऊमा चोटहरू !
पोल
झुटा बाचा कसम र
अठोटहरू !
खरानीको टीका लगाऊ !
इमान छ भने पिरोल्छ
खोलामा लगेर बगाऊ ।
उद्योगहरू भत्काऊ
क्याम्पसहरू भत्काऊ
अब
१२ पास गरेको युवा
देशमा बस्नै नसक्ने बनाऊ
भत्काऊ
आमाका योनिहरू
त्यो पनि तिमीले
जन्मिदा
एकपल्ट भत्काएकै हो ।
करङ र मेरुदण्ड भत्काऊ र
भग्नावशेषमा टाँस
हामी देश बनाइरहेछौँ ।
अनि एक्लै खाऊ ।

अब तिमीले
कर्मचारीलाई
तलब दिनु पर्दैन
भूतपूर्वलाई
पेन्सन दिनुपर्दैन
बृद्धभत्ताको
टेन्सन लिनु पर्दैन ।
किसानलाई
मल दिनु पर्दैन
बुडापाका मात्र बसेपछि
हिड्न सक्दैनन्
त्यसैले
बाटो बनाउनु पर्दैन
युवायुवती
देशमै बस्दैनन्
त्यसैले खेतीयोग्य
माटो बनाउनु पर्दैन ।
विनिर्माण गर
उत्तर आधुनिक बन
संस्कृति भत्काऊ
प्रकृति भत्काऊ ।
अन्तिममा संसद भत्काऊ
देश अरुलाई बुझाऊ
तिमी पनि उतै जाऊ
र मस्तले जिन्दगी बिताऊ ।
यता
कात्रो किन्ने
पैसा नहोस्
मलामी हिन्ने
मान्छे नहोस् ।
तिमीलाई बाल मतलब
उतै बसेर
राष्ट्रिय गीत गाऊ ।

०००
खाँदबारी, सङ्खुवासभा