म यस्तो जमिनमा उभिएको छु !
बेँसी र मैदानले सुनौला बाला झुलाएर जीवन जगतको हित सजाउँछन् तर नेताहरू देश बेचेको तमसुकमा ल्याप्चे ठोकेर राष्ट्रिय गीत गाउँछन् !!
म यस्तो जमिनमा उभिएको छु !
ताराबहादुर बुढाथोकी
म यस्तो जमिनमा उभिएको छु
हिजो
जहाँबाट ज्योतिर्लिङ्ग
पलाएको छ
वुद्धका पाइलैपिच्छे
कमल कल्कलाएको छ
पारूहाङ्-सुम्निमाको
प्रीति सल्बलाएको छ
तर आज
दराजका फायलदेखि
मान्छे
र कम्प्युटरका मेमोरीसम्म
भ्रष्टाचारको भाइरस
सल्बलाएको छ
म यस्तो जमिनमा
उभिएको छु
जहाँबाट
जुरूक्क उठेर
हिमाल अग्लिएको छ
भुल्भुलाउँदै निस्केर
नदी सङ्लेको छ
चौंरी गोठालाले
विनायो बजाएको सुनेर
मायाले
रातो पाण्डा
र लाली गुराँसको पनि
मन पग्लिएको छ
तर
हरेक दिन
झुटको खेती सप्रिएको छ
इमान
र निष्ठा
ढुङ्गाको पिपलजस्तै
कक्रिएको छ
कक्रिएको छ
म यस्तो माटोमा उभिएको छु
जहाँ
वरपिपलले
चौतारीमा बसेर
युगीन प्रीत लाउँछन्
छहराले
लहराबाट
पहरामा हाम्फाल्दै
जागरणको
सङ्गीत बजाउँछन्
जूनले
बादलबाट चियाएर
शान्तिसँग मित लाउँछन्
बेँसी
र मैदानले
सुनौला बाला झुलाएर
जीवन जगतको
हित सजाउँछन्
तर नेताहरू
देश बेचेको
तमसुकमा ल्याप्चे ठोकेर
राष्ट्रिय गीत गाउँछन् !!
०००
खाँदबारी ।