नेपाली हास्यव्यङ्ग्य अनलाइन पत्रिका

नगिता लेप्चा राई :

हाम्रो चालामाला, रहन-सहन गजबै भएको छ हिजोआज । उहिले घरमा गाई पालिन्थ्यो । कुखुरा पालिन्थ्यो । हिजोआज फ्ल्याटै फ्ल्याटै फल्याटै मिचिसकेको छ । अब गाई कुखुरा होइन, गाड़ी र कुकुर राख्ने रहरले मिचेको छ हाम्रो गाउँ-घरलाई ।

गाड़ी चाहिन्छ ? कुन कुन ब्राण्डको गाड़ी चाहिन्छ । गाड़ीको दलाली गर्नेसित सम्पर्क राख्नोस्, भोलि नै तपाईंको घरको सङ्घारै अघि जस्तै रङको पनि गाड़ी आइपुग्छ । बस महिनैपिच्छे इन्सटलमेण्ट बुझाउनुपर्‍यो । उहिलेजस्तो गाड़ी किन्नलाई क्याटका क्याट नोट एकैपल्टमा बुझाउनु पर्दैन । सामान्य प्रतिशत तिर्नुहोस् बस् गाड़ी तपाईंको घरमा ।

छिमेकीको देखासिकीमा वा आह्रिस गरेर गाड़ी किन्ने हामीलाई देशान लागेको छ । पल्लोपट्टिकाले गाड़ी किन्नु अनि वल्लोपट्टिको गाड़ी नकिन्नु कहाँ भयो ? प्रेष्टिज पङ्चर हुन्छ । प्रेष्टिजकै निम्ति पनि जसोतसो ऋणपान गरेर, के के बन्दगी राखेर गाड़ी आउनैपर्छ । तब मात्र छिमेकीसित कुम दजाउँन मज्जा आउँछ । प्रत्येकको घरमा गाड़ी हुनु असल हो । तर छिमेकीको देखासिकी घरमा ल्याएको गाड़ी इन्सटेलमेण्ट तिर्न नसकेर क्रेनले तानेर लगेको नराम्रो हो ।

गाड़ी क्रेनले तानेर लैजावोस् कि ट्याक्स तिर्न नसकेर सास्ती भोग्नु परोस् त्यसको कुनै वास्ता नगरी हामी गाड़ी किन्छौं ।

इन्सटलमेण्टमा ल्याएको गाड़ी त गाड़ी भइगयो । तर हिजोआज हामी प्रत्येकलाई दामी महङ्गो कुकुर पाल्ने देशानले भेटेको छ । पल्लो घरकाले कुकुर ल्यायो त्यसको भन्दा दामी कुकुर म पनि किन नपाल्नु ? के म कुकुर किन्न सक्तिनँ ? माफ गर्नुहोला । कुकुर होइन डगी… । तपाईंको घरमा मात्रै डगी हुने ? मेरो चाहिँ नहुने ?

तपाईं फेरी फेरी गाड़ी किन्नुहोस् वा महङ्गोभन्दा महङ्गो दामको डगी ल्याउनुहोस् । मेरो भन्नु केही छैन । गाड़ी तपाईंको डगी तपाईंको । तपाईं भन्नुहुन्छ होला, माई पोपर्टी माई विस । हो हजूर, तपाईं गाड़ीका मालिक डगीका मालिक । तपाई कति महान् ।

तर हजूरले मर्निङ वक जाँदा साथमा तपाईंको प्रिय डगीलाई पनि वकमा लानुहुन्छ । साङ्लोमा बाँधिएको डगीले तपाईंलाई जता तान्छ तपाईं उतै उतै लाग्नुहुन्छ । तपाईंले साङ्लोमा बाँधिएको डगीलाई आफू खुसीले तानेर तपाईंले चाहेको ठाउँमा लानु सक्नुहुन्न । मलाई त लाग्छ, मर्निङ वकमा तपाईंको डगीले तपाईंलाई घिसारेको देख्दा हाम्रा नेतालाई अरुनै महामहिम नेताले घिसारेको जस्तो लाग्छ ।

मैले भन्दैथिएँ… डगी तपाईंको हो । तपाईंको डगीले मेरो घर अघि नै उनको सामग्री अऩलोडक गरेको चाहिँ अलिक सुहाएन है । तपाईंको डगीले के भनेर त्यसको सामग्री मेरो घर अघि अनलोड गर्ने ? मेरो डगीले पनि तपाईंको घरको मूल फाटकमै त्यसको मल अनलोड गऱेको छ र तपाईंले त्यसलाई क्याच्चै पार्नुभो भने ? थाहा छ हजूर, विदेशमा पनि डगी पालिन्छ । उनीहरू पनि तपाईंजस्तै मर्निङ वकमा डगी लिएर जान्छन् ठिक तपाईंजस्तै । तर याद गर्नुभएको छ हजूर ? उनीहरूले जहिले पनि एउटा सानो प्लाष्टिक बोकेका हुन्छन् । जहाँ कतै पनि उनको डगीले मल त्याग गरे तुरुन्तै त्यस मललाई सोहोरी प्लाष्टिकमा हाली ठाउँ-ठाउँमा नगरपालिकाले राखिदिएको विराट विराट डस्टबिनमा राखिदिन्छन् । के तपाईंले मेरो घर अघि आफ्नो डगीले अनलोड गरेको मल सोहोरेर प्लाष्टिकमा हाली डस्टबिनमा फ्याँकिदिनुहुन्छ ? नेभर… ! कदाचित त्यसो गर्नुहुन्न । डगी तपाईंको हो तर तपाईंको डगीले मल अनलोड गर्ने मेरो घरको अघिल्तिर, फाटक वा भुइँ कदाचित् तपाईंको होइन । डगी पालेर मैँ हुँ भन्ने धाक देखाएर मात्र होइन डगीको मलत्याग गर्ने ठाउँ पनि अरुको घरको अघिल्तिर होइन भन्ने कुरो हजूरले बुझ्नुपर्छ ।

यसकारण गाड़ी किन्नुहोस् तपाईंको मर्जी ।
डगी पाल्नोस् तपाईंको हबी । वा पर्सनालिटी ।
तर डगी पालेर मर्निङ वक गर्ने निहुँमा कसैको घरअघि कृपया मैला नथुपारी दिनुहोस् ।

०००
जलपाइगुड़ी, भारत