पुराण लगाऊ ओ सरकार !
मुलुकै मात्र कङ्गाल रैछ जनता त धनी रान् दिनमै करोड पुराणमा दिने हेर क्या ज्ञानी रान् ती दीनबन्धु बाजेलाई डाक पर्वचन हाँक्नलाई पुराण लगाऊ ओ सरकार ! अब विदेश घुम्नलाई ।
भ्रमणको खर्च नसक्ने भयो मुलुकले धान्नलाई
पुराण लगाऊ ओ सरकार ! अब विदेश घुम्नलाई ।
अस्पताल खोल्न एक पैसा पनि नझिक्ने जनता
पैसाको ओइरो-पोइरो लाउँछन् ‘पुराण’ भने ता
त्यसैले हेर ! विदेश भ्रमण खर्च कोष खोल्नलाई
पुराण लगाऊ ओ सरकार ! अब विदेश घुम्नलाई ।
विदेश घुम्ने सरकारी ताँती क्या जम्बो हेर त !
कताको विकास बजेटले तिनलाई डुलाउँछौ सोच त !
त्यसैले हेर सल्लाह दिन्छु उपाय झिक्नलाई
पुराण लगाऊ ओ सरकार ! अब विदेश घुम्नलाई ।
मुलुकै मात्र कङ्गाल रैछ जनता त धनी रान्
दिनमै करोड पुराणमा दिने हेर क्या ज्ञानी रान्
ती दीनबन्धु बाजेलाई डाक पर्वचन हाँक्नलाई
पुराण लगाऊ ओ सरकार ! अब विदेश घुम्नलाई ।
पर्धान मन्त्री जनताको घरमा पनि त जानु छ
त्याँ पनि आउरे-बाउरे सबै उडाई लानु छ
खर्च त हुन्छ त्याँ पनि लाखौं त्यो खर्च धान्नलाई
पुराण लगाऊ ओ सरकार ! अब विदेश घुम्नलाई ।
०००
२०६९ आश्विन ८