रुद्र ज्ञवालीचार ठोक्तक
निष्प्रभावी बन्छन् सिद्धान्त सूत्र र परिभाषाहरू राजनीतिमा हजुर दुई दुने तीन अथवा पाँच हुन्छ ।
१.
किम-ट्रम्पका सल्लाहकार छन् आबेका मीत काफी छन्
सिंहदरबार नचाउन एमसिसिका गीत सङ्गीत काफी छन्
दुख कष्ट नगर्नुस् कलाकारहरूले हसाउन यो गाइजात्रामा
दुनियाँ हसाउन यो सरकारका दुइथान पुरोहित काफी छन् ।
२.
हुनु नहुनु यही देशमा हुन्छ कम्तिमा आधारात घर्किएपछि
भान्साको जुठो चाटचुट पारेर बिरालो बासमा फर्किएपछि
मन्त्र निर्वाणका जप्दैछ अचेल रातो मुखुण्डोमा धुर्त स्याल
पुरोहित बनेका फ्याउराहरूले गङ्गाजल र गहुँत छर्किएपछि ।
३.
गफाष्टीले खगोलका तारा झार्ला नझार्ला सोच्दैछु
हुँडारले चेपुवामा रतुवालाई पार्ला नपार्ला सोच्दैछु
महन्त भेषमा देखिए जब नामूद खुँखार व्याधाहरू
चितुवाले पनि घाँसमा गुजारा टार्ला नटार्ला सोच्दैछु ।
४.
कहिले कत्थक र कहिले ताण्डव नाच हुन्छ
निभेको अगुल्टोलाई खरानीको पनि आँच हुन्छ
निष्प्रभावी बन्छन् सिद्धान्त सूत्र र परिभाषाहरू
राजनीतिमा हजुर दुई दुने तीन अथवा पाँच हुन्छ ।
०००
