नेपाली हास्यव्यङ्ग्य अनलाइन पत्रिका

डा. गंगाप्रसाद अधिकारी :

एउटा गाउँमा बुढा र बुढी मात्रै बस्थे । छोराछोरी हाम्रै जस्तो कोइ क्यानडा, कोइ अम्रिका, कोइ कता । दुवै सँगसँगै जस्तो मरेछन् ।
दुवै जना स्वर्ग र नर्क जाने बोर्डरमा पुगे । बोर्डरमै चित्रगुप्तको कार्यालय रहेछ । चित्रगुप्तले दुवैको पाप-धर्मको अभिलेख पल्टाए । बुढीको अकाउन्टमा ९९ धर्म र १ मात्र पाप दर्ता रछ । बुढाको खाता पल्टाए, ठ्याक्कै उल्टो- १ धर्म ९९ पाप ।

गुप्त बाले बुढी आमैलाई सोधे- तपाईंले एउटा पाप र ९९ धर्म गर्नुभएछ । पहिले धर्मको फल भोग्ने कि पापको ?
बुढी आमैले विचार गरिन् – एउटै पापको भोग त हो, भोगिहाल्छु । तेसपछि ढुक्कै स्वर्गमा बस्छु । उनले चित्रगुप्तलाई आफ्नो इच्छा जाहेर गरिन् र तल्लो बाटो भएर नर्कतिर लागिन् ।

गुप्तजी बुढातिर फर्केका मात्र थिए, बुढाले आफ्नो निर्णय सुनाइहाले – आ ! म त त्यो एउटा धर्मको पनि भोग गरिहाल्छु । पछि जेहोला !
बुढा स्वर्गका उर्वसी, मेनका, रम्भा, तिलोत्तमाहरू सम्झेर थुक निल्दै माथ्लो बाटो लागे स्वर्गतिर ।

बाबै आमैको आआफ्नो पाप र धर्मको भोग सकिएर ठाउँ फेर्न तीनचार दिन मात्रै बाँकी थियो, बोर्डर क्षेत्रमा आँधीबेहरी आएर चित्रगुप्तको रेकर्ड फाइल नै बेपत्ता पार्दिएछ । अब भएन फसाद !

बिचरी आमै ऐले पनि नरकमा यातनै भोग्दै छिन् अरे । एता बाबै उर्वशी रम्भाहरूसँग छिल्लिँदै स्वर्गको मस्तीमा मस्त ! हैट  !

०००
ठट्टा गरेको दिन, फागु पुर्नियाँ २०८१