नेपाली हास्यव्यङ्ग्य अनलाइन पत्रिका

अर्जुन पराजुली :

यिनीहरू हाँस्दै आए भने
सम्झनू- यिनीहरूले कसैलाई रुवाएर आए !

यिनीहरूले जन्मदिन मनाए भने
सम्झनू- यिनीहरूले कसैको जन्मदिन काटेर खाए !

यिनीहरूले कसैलाई बेइमान भने भने
सम्झनू- त्यो मान्छे इमानदार रहेछ !

यिनीहरूले चोर आयो भने- भने
सम्झनू- आज घरको ढोका नलाई सुते भएछ !

यिनीहरूले रात पर्‍यो भने- भने
सम्झनू- आँगनमा घामका किरणहरूको भेला भयो !

यिनीहरूले उज्यालो भयो भने- भने
सम्झनू- अब सुत्ने बेला भयो !

यिनीहरूले छाता ओढे भने
सम्झनू – आज पानी परेको छैन !

यिनीहरूले शंख फुके भने
सम्झनू- आज कोही मरेको छैन !

यिनीहरूले नमस्ते गरे भने
सम्झनू- एक महिनापछि चुनाव आउँदैछ !

यिनीहरू सुम्सुम्याउन अगाडि सरे भने
सम्झनू- आज मेरो शरीरको कुनै अङ्ग हराउँदैछ !!

०००
सितलपाखा, कीर्तिपुर