नेपाली हास्यव्यङ्ग्य अनलाइन पत्रिका

श्री मान कार्यकारी प्रमुख

ब्रह्मलोक, ब्रह्मानगर

बिषय : एक घण्टा समय थप गराई पाउँ ।

उपरोक्त सम्बन्धमा म यो जानकारी गराउन चाहन्छु कि यस पृथ्वीलोक र ब्रह्माण्डको सृष्टिकर्ता हजुर नै हुनुहुन्छ । यही सत्यतालाई ध्यानमा राखी मेरा हरेक दैनिक कृयाकलापहरूमा आइपरेको कठिन परिस्थितिलाई सरल र सहज पार्न हजुरकै चरण कमलमा परें । मलाई समय कम भएकै कारणले गर्दा मेरो दैनिकीमा स्कुल बस छुट्न थाल्यो, कलेजको गेट बन्द भए, म पसल पुग्दा पसलको ढोका बन्द भए, कहिले बसपार्कको बस छुट्छ, कहिले माइक्रो र रिक्सा छुट्छ्, कहिले टेलिसिरिएल त कहिले फिल्महलको टिकट छुट्छ, हुँदाहुँदै हस्पिटलको टिकट पनि लिन छुटें, प्लेनको टिकट पनि छुट्यो । यति मात्र नभएर मेरो गाँस छुट्यो, मेरो साथ छुट्यो, गोष्ठी सभा सम्मेलन र समारोह छ्ट्यो, आलराम बजाउँदा बजाउदै मेरो निन्द्रा पनि छुट्यो, कहिले मेरो मालिक मुन्टो बटार्छ, कहिले मेरी मुन्टो बटार्छे, हुँदाहुँदै मेरो अनलाईन पनि छुट्न थाल्यो ।
यस्तो जटिल परिवेशमा मेरो उद्दार गर्ने हजुर नै हुनुहुन्छ्, बरु हजुरको नाममा एक लाख बत्ती बालौंला, दैनिक पुरान लगाउँला । मेरो बिन्ती प्रभु मलाई चौबिस घण्टाबाट एक घण्टा थपिदिनुस्, सबै काम समयमानै सकुँला अन्यथा भएमा सजायको भागिदार रहुँला हजुरको जो कृपा ।

निवेदक
कलिभक्त दिनेश
हतारनगर, बेफुर्सदी टोल
नयाँनेपाल