नेपाली हास्यव्यङ्ग्य अनलाइन पत्रिका

चोरलाई चौतारोमा, साधु शुली चढाएर !
नयाँ नेपाल बनाईदैछ यस्तै नजिर बसाएर ।

कात्रो पनि हिच्किचाउला हजुरको सरम ढाक्न !
किन हिंड्या माननीय दौरा सुरुवाल लगाएर ?

मैले पनि ‘बा’ हुनुको जिम्मेवारी पूरा गरें !
छोरालाई शिरमा ऋण, हातमा पासपोर्ट थमाएर ।

“हजुरलाई हर् धड्कनमा सम्झिरा’छु” भन्छिन् प्र्रिया,
पैसा हाताँ पर्या दिन छोटो सन्देश पठाएर ।

पढ छोरी भन्छु आफू, अंशतिरै आँखा लाउँछे,
उपबुज्रुक आमाचैंले नारी शिक्षा रटाएर ।

जीवनरुपी भुत्भुतेमा सुख नामको ढुङ्गो पोली,
पाकेपछि खालास् भनि राख्या’छु मन् फकाएर ।

मोती टिप्न ‘सागर’ भित्रै डुब्नुपर्छ महोदय !!
भेटिँदैन बाग्मतीको बगरमा कराएर !