टिपनटापनछ ठोकान
डम्बर घिमिरे
गरीबका छोरीहरू राम्रा पनि त्रिकुटी छन्
धनीका ती छोरीहरू कुरूप पनि भृकुटी छन्
गरीबका छोरीहरू पाउँदैनन् पढ्न च्याम्पो
धनवानका छोरीहरू सबै भेट्छन स्रङचङगम्पो ।
000
हरि काफ्ले
परेको छ सङ्गत गर्न ती अनौठा जीवसँग
धन दौलतका हुँदाखाँदा मनका चाहिं गरीबसँग
‘हरि’लाई हेलाँ गरी पैसालाई पूजा गर्छन्,
दया माया रत्ती छैन ती अनौठा जीवसँग ।
000
आनन्द श्रेष्ठ
आधा शरिर ढाकिएको आधा नाङ्गो देख्छु
फोटो खिच्दा तिम्रो मुहार किन बाङ्गो देख्छु
पोशाक अनि व्यवहारले दिन्छ परिचय
आधा शरीर छोपिए नि सब उदाङ्गो देख्छु ।
000
लुम्विनी अधिकारी
च्याटमा मस्त भई भुलिरहन्छ ऊ नेटमा
भेट्न आउने कार्यकर्ताको लाम छ गेटमा
भन्छन् ज्यूनार हुँदैछ उहाँको, यो खाने समय हो
पर्खिन्छन् कार्यकर्ता महिनौं भोको पेटमा ।
000
देवेन्द्र घिमिरे
हटायौं हामीले समूल राजतन्त्र
ल्यायौं आफैले चाहेको लोकतन्त्र
काम कालुले गरे ठालू फल खाँदैछन्
तिनकै घेरामा कैदी छ हाम्रो गणतन्त्र !
000
सीता तिवारी
राहदानी बनाउने लाम देखेर,
हैरान छु यो चक्काजाम देखेर ।
असिना झै पसिनाका धारा छुटेपछि,
लाचार छु यति चर्का घाम देखेर !!
