नेपाली हास्यव्यङ्ग्य अनलाइन पत्रिका

१.आवश्यकता

चिठी लेखेपछि त्यसलाई टाँस्न गम चाहिन्छ,
हामी नेपाली भीरपाखा खोस्रेर बाँच्छौँ
कहाँ ट्याङ्क, गोला र बमको कुरा
गरिब हाँस्न त मिठो आलुदम चाहिन्छ ।

२. धेरै भए

गुरुभन्दा चेला धेरै भए
काम गर्ने छैनन् गोष्ठी र भेला धेरै भए
नायकको अभाव थियो यहाँ
तर खलनायकहरूको प्रदर्शनबीच
व्यर्थ राजनीतिका खेला धेरै भए ।

३. जागिर

यो नपाइन्जेल अलङ्कार
पाएपछि पुरस्कार
हुनुपर्ने परिष्कार
भइरहेछ– बेकार ।

४. राजनीति

फल पाउनेका लागि
राजनीति एउटा नशा हो,
फल नपाउनेका लागि
मन्साएर नमन्सिने, पन्साएर नपन्सिने
साढेसातको दशा हो ।

५. विवाह

आफू खुसीको दरबन्दी
आफ्नै तोकादेशमा
निःशुल्क दर्ता हुने
एउटा निवेदन ।

मन्थली क्याम्पस, मन्थली, रामेछाप