नेपाली हास्यव्यङ्ग्य अनलाइन पत्रिका

चाकरीबाज हुन् ‘बाज’, चुक्लीखोर त ‘चोर’ हुन्
चिल्लो घसेर बोल्ने ता, साक्षात् गोमन बिच्छी हुन् ।
चाचा दिई चिची ख्वाई, हिँड्ने चतुर स्याल हुन्
शीर्ष तीर्थ भनी भुक्ने, साक्षात् दुष्ट दलाल हुन् ।।१।।

अशुद्धजीवी भो बुद्धि–जीवी बन्ने जमात नै
दलको खोरमा हाँस्छन्, दाना घाँस समाउँदै ।
विवेक बन्दकी राखी, भुँडी–पूजा सुलक्ष्य भो
प्रा.डा. प्राविधिके–पण्डा, ढोका पाले बने अहो ।।२।।

कुलको पति बन्दैछन्, कुलङ्गार कयौँ यहाँ
प्राज्ञको पगरी गुत्छन्, अज्ञ–मूर्ख सयौँ जहाँ ।
डन मन्त्री बनेको छ, चोके ढ्याके सबै ठूला
लोकतन्त्र कहाँ फुल्छ, सबै कानुन छन् लुला ।।३।।

धादिङ