नेपाली हास्यव्यङ्ग्य अनलाइन पत्रिका

मृत्यु

भ्रष्टाचारको दलदलमा अनेकौं भासहरू छन्
नेतृत्वको वाणीमा गन्हाएका सासहरू छन्
देशै चिहान बनेपछि मृत्यु सस्तो हुँदो रै’छ
आज हिमाल, पहाड तराई जताततै लासहरू छन् ।

हल्लाको पिरामिड

एउटा भन्छ– ‘देश विदेशीको अखडा बन्दै छ’
अर्को भन्छ– ‘देश टेन्च र एम्बुसको बङ्कर हुँदैछ’
हल्लैहल्लाको पिरामिडभित्र विना ग्यारेन्टीको
प्रजातन्त्र खासाको सामान बन्दैछ ।

आँखाको इसारा

आँखाले आँखालाई आँखाको इसारा छ,
भाकाले भाकालाई भाकाको पुकारा छ,
वियोग नै प्रेमको उत्कर्ष रहेछ कि कसो ?
मिलनको चाह नै हृदयको सहारा छ ।

सस्तो मृत्यु

प्रण गरेपछि बाग्मतीमा अब नदी पसेको छ
होस खुलेपछि अब तन्त्रमा माया बसेको छ,
मृत्यु दस रुपैयाँ धार्नीभन्दा सस्तियो यहाँ
आफन्तीहरूको आँखाबाट पानीजस्तै आँसु खसेको छ ।

सर्म
आधुनिकताले मानिसको पर्म खोसी दियो,
मनमा पाप छिप्पिएपछि धर्म चोरी दियो,
भौतिक सुखका निम्ति महको माखो बनेपछि–
मानिसले सबैभन्दा पहिले सर्म छोडिदियो ।

मन्थली क्याम्पस, रामेछाप