दिव्य गिरीतिन खोक्तक
१.
चोर र फटाहाहरूको मान सम्मान भैरहेछ हिजोआज
अपराधीहरूकै ठूलो गुनगान भैरहेछ हिजोआज
अचम्म अचम्म देखिन्छ है भन्थे कलियुगमा
हेर, मुसो हात्ती बनेर महान भैरहेछ हिजोआज ।
२.
यहाँ जो चोर छ, उसैको ठूलो स्वर हुन्छ
यहाँ अपराधीकै गुनगान घनघोर हुन्छ
झूठ बोल्नेकै हालीमुहाली चल्छ यो शहरमा
यहाँ जो सत्य बोल्छ, ऊ सधैं बिजोर हुन्छ ।
३
आफ्नै मित्रलाई प्रशंसा लेखाउनु भयो
आफूभन्दा अग्लो उचाई देखाउनु भयो
इतिहासले एकदिन तपाइँको वजन जोख्छ
हनुमान बन्न बाँदरलाई शिरमा टेकाउनु भयो ।
ललितपुर
