नेपाली हास्यव्यङ्ग्य अनलाइन पत्रिका

देवेन्द्र घिमिरे

ठिक्क खानेबेला अभागीहरू रिसाउँछन्,
बाठाहरू तिनकै भाग समेत पचाउँछन्,
आफ्नै हकहित नबुझ्ने अभागेहरू,
आँखा चिम्लन्छन् र पुर्पुरो समाउँछन् !

000
दिव्य गिरी

कसै कसैको सपना भने पूर्ण भो
कति कतिका घर भरिपूर्ण भो
शहीदहरू चिच्च्याई रहेछन्
हामीले बलिदान दिएको देश चूर्ण भो ।

000

चूडा निर्भीक

गाडी पाकिर्ङ देखियो महलमा, प्राडो पजेरो कतै
मान्छे फेरि देखिए सडकमा, नाङ्गै सुतेका कतै
खानाको अभावमा लसुनको, खोजी हुने भो कतै
हीरा औ सुनका हजार गहना, राखिन्छ टन्नै कतै ।

000

भवानी हुमागाई

तन दुखायो आज उस्ले मन दुखायो
फेरि अतीत कोट्याएर झन दुखायो
सांचेकै थे मुटुभित्र धुजा धुजा भएपनि
छुरी प्रहार गरी गरी जीवन दुखायो †

000

विनोद उदय

भन्नैपर्छ तिम्रो एउटा बानी खत्तम छ
खाएकै थालमा थुक्ने तिम्रो कहानी खत्तम छ
यहीबाट नाम, दाम, काम सबै पाएका छौ
तर सधै भन्ने गर्छौ राजधानी खत्तम छ !

000

हरिकृष्ण काफ्ले

नरम्पना कही छैन जता टेक्यो सारो मात्रै
शहर भन्नु यस्तै हो कि पानी छैन धारो मात्रै ?
हेर्न लाई त बजारमा झिलीमिली अनेकौं छन्,
लाभ लुट्छन ब्यापारीले, घुमन्तेलाई छारो मात्रै ।