नेपाली हास्यव्यङ्ग्य अनलाइन पत्रिका

पढ्दा पढ्दै
च्यातियो गाता
हेर्दा हेर्दै
छुट्टिए पाना
जतन गर्नै नजानेर
पानाहरूको डुङ्गुर भयो शब्दकोश
पटक पटक मिलाएँ
पक पटक खात लगाएँ
भाँती पुगेन
पानाहरू किताब भएनन्
असरल्ल छरिए पाना
पानाहरू खापिए
तर क्रममा उनिएनन्
जोख्दा बराबर
गन्दा बराबर
तर क्रमहीन
शृङ्खलाहीन
शिर छ पुच्छर छैन
पुच्छर छ ढाड छैन
शब्द छ अर्थ छैन
अर्थ छ गति छैन
अराजक भए अक्षर
मधुरो भयो अर्थको उज्यालो
नियमित हेरिरहन्छु म
पानाहरूमा परिणत शब्दकोश
पत्करहरूमा परिणत पाना
सम्झिरहन्छु
गोर्वाचोभले च्यातेको ठूलो देश
र उत्तरआधुनिक संरचनामा
विरचित नयाँ नेपाल
लाग्छ
काव्यात्मक सादृश्यता छ तिनमा
असरल्ल अराजकता छ
शब्दकोश सम्झिरहन्छु
पानाहरू हेरिरहन्छु
पत्करहरू देखिरहन्छु
पछुतो छ
किताब जतन गर्न
नजानेको आफ्नो इतिहासप्रति ।
काठमाडौं