विक्रम सुब्बाव्याकरण
जताततै जातजातका जुलुस जागेर
तीरझैं तेजिला प्रश्न तेर्स्याई रहेछन्–
हतियारकै धन्दा चलाउनको लागि
युद्धको बजार खोल्ने व्यापारीको गतिविधी
र अमेरिकन मन्त्रीको विदेश यात्रामा के फरक छ ?
दुनियाँ लुट्ने मल्टिनेसनल कम्पनीको तमसुक
र अमेरिकाको खुँखार मुनिम जस्तो लाग्ने
विश्वबैंकको व्याजदरमा के फरक छ ?
संसारभरि सुलसुलेझैं काम गर्ने युएनका अनुहार
र पेण्टागनका रिपोर्टहरूमा के फरक छ ?
जालोझैं फैलिएका दातृसंस्थाका आँखा
र ह्वाइटहाउसको खुँखार नजरमा के फरक छ ?
यी प्रश्नवाचक वाक्यहरूमा
वक्य गठन र ह्रश्व–दीर्घ मिलेको छ कि छैन
हेर्नुस् त सम्पादक शर्माजी !
सामन्तहरूले जुवा खेल्ने क्लव
र काँग्रेसको बैठकमा के फरक छ ?
काँग्रेसको पुच्छरको झुप्पा
र बल्खु दरवारको जुँगामा के फरक छ ?
स्वाँठ राजकुमारहरूले जाँड खाने भट्टी
र राप्रपाको च्याँखे दाउमा के फरक छ ?
लठैत र हुल्लडबाजहरूको डाङडुङे ग्याङ
र मिलिसियाहरूको कार्यशैलीमा के फरक छ ?
सबैभन्दा फटाहा मानिसको हरकत
र जासुसहरूका गोप्य बैठकहरूमा के फरक छ ?
कुनै षडयन्त्रकारी अड्डाका अकिञ्चन योजना
र सिंहदरबारको गिदी–जिब्रोमा के फरक छ ?
यी जिज्ञासाहरूमा
कला र शैली मिलेको छ कि छैन ?
हेरिदिनोस् त समालोचक त्रिपाठीजी !
जनजाति, महिला र दलितको टाउको देखाएर
क्षेत्री–बाहुनको ह्याकुला बेच्ने मासु पसल
र व्यवस्थापिकाको पटाङ्गिनीमा के फरक छ ?
कानुनी डाकाका हातको हँसिया–हथौडा
र पाखण्डी सरकारी विभागहरूमा के फरक छ ?
खुँखार चोरहरूलाई सुरक्षा दिने किल्ला
र अदालतका पर्खालहरूमा के फरक छ ?
घुस र कमिसनका हड्डी चपाउँने बङ्गारा
र सरकारी कर्मचारीहरूमा के फरक छ ?
भेडाका गर्धनमा गाडिएका ब्वाँसाका दाह्रा–नङ्ग्रा
र देशवासीले तिरेको कर खाएर
मोटाएका विधायकहरूमा के फरक छ ?
कर्णली र लिम्बुवानको गर्धनमा हान्न
निरङ्कुश काठमाण्डुले उचालेको खुँडाको धार
र यो संविधानका नियतहरूमा के फरक छ ?
यी सोधनीहरूमा
व्याकरण मिलेको छ कि छैन ?
हेरिदिनोस् त भाषाविद पोखरेलजी !
काठमाडौं
