नेपाली हास्यव्यङ्ग्य अनलाइन पत्रिका

विक्रम सुब्बा :

जुन उपत्यकामा ‘सिंह’ कहिल्यै थिएन
कसको कैफियती वीर्यले तँ
बास्टार्ड ‘सिंहदर्वार’ जन्मिस्, र
मुलुकको भीर-पाखा र दूरदराजका मनुवाका
खुन-पसिना खैँचेर बैभव कमाईस् ?

सिंहदर्वार, तँ चुपचाप केही नबोली
सधैं, हरेक नेताका मुखमा
दाह्रा-बङ्गारा जडान गरिदिन्छस्
जसले मानिसको सिकार पक्रेर
तेरो निम्ति कवाफ जुटाइदिन्छन्
जन-जनको सेवक जागिर पाएका
हाकिम र कर्मचारीका औँलाहरूमा तँ
हिंस्रक नङ्ग्राहरू जडान गरिदिन्छस्
जसले रैथाने मानिसको निरीह छाती लुछेर
तेरो लागि छोएला र सेकुवा ल्याइदिन्छन्
म छक्कै परेको छु, कि –
तेरो बा-आमा सिंह-सिंहिनी नै थिए भने
तेरो नाक त थेप्चो हुनु पर्ने हो,
आँखा चिम्सा हुनु पर्ने हुन्
झ्याप्प दाह्री-जुँगा कुन ककेशीयनकोबाट
तेरो ओँठ र चिउँडोमा सारिस् ?
धूर्त खुराफाती दिमाग
कुन चाणक्यको खप्परबाट आफ्नोमा हालिस् ?
भन्, तेरो आसली रुप के हो ‘सिंहदर्वार’ ?

मलाई शंका लागेकोछ, कि-
भारतीय नस्लको कुनै हरामी सिंहले
कान्तिपुरको कुकुर्नीलाई वीर्य दान गरेपछि
तँ जन्मेको पो हो कि ‘सिंहदर्वार !’
खाँट्टी ‘सिंह’ त यति खिच्चो नहुनु पर्ने हो
भन्, तँ जन्मेपछि वरिपरिका
कति तामाङका जवान रगत-पसिना पिइस् ?
अनेक कालखण्डहरूमा सातसाल सम्ममा
कति नागरिकलाई तुरुङ ठोकेर मारिस् ?
कति ईमान्दार जनतालाई शुलीमा झुन्ड्याइस् ?
कति पतिव्रतालाई चीतामा शती चढाइस् ?
कति बाहुन-टाउको चारपाटे मुडेर भन्ज्याङ कटाइस् ?
कति राजालाई तरुनी-रक्सीले मताएर
आफ्नो निम्ती ‘राजदण्ड’ हात पारिस् ?
आफूलाई ‘सिंहदर्वार’ भन्दै, यहीँबाट
एकतन्त्रे शासन कसरी चलाइस् ?

आफूलाई ‘सिंहदर्वार’ भन्दै, यहीँबाट
निरंकुशतन्त्र कसरी चलाइस् ?
आफुलाई ‘सिंहदर्वार’ नै भन्दै, यहीँबाट
उत्ताउलो-बिहारी प्रजातन्त्रे शासन कसरी चलाइस् ?
आफूलाई ‘सिंहदर्वार’ भनेरै, यहीँबाट
पञ्चायती हिजडा शासन कसरी चलाइस् ?
‘सिंहदर्वार’कै आडमा लुकेर, यहीँबाट
नौलो लोकतन्त्रे नाटक कसरी खेलिस् ?
आफूलाई ‘सिंहदर्वार’ भनेरै, यहीँबाट
गणतन्त्रको न्वारानको दिनैदेखि
कसरी मुलुकलाई खाल्डोमा हालिस् ?

बोल, सिंहदर्वार, बोल !
जुन उपत्यकाको इतिहासमा
‘सिंह’ कहिल्यै थिएनन् भने, तँ
कसको कैफियती वीर्यले ‘दरवार’ भएर जन्मिस् ?
नबोली चुपचाप अझै मुलुकलाई वर्वाद गर्छस् भने
अब म, दावानल-भुइँचालो भएर तँलाई ध्वस्त पार्नेछु
त्यसपछिको मुलुकमा
‘दर्वार’का निम्ति केही हुने छैन, तर
जनजनका ‘घर्बार’का निम्ति सबथोक हुनेछ ।

०००