नेपाली हास्यव्यङ्ग्य अनलाइन पत्रिका

हह माले हह तारे, थर्काएर जोत्नु पर्छ
मङ्सिरको बाँझो पो त, चर्काएर जोत्नु पर्छ ।

हलोजुवा दाइँने देउरे, हल्लुण हरिस मिलाएर
सार लामो छोटो ठेडी सर्काएर जोत्नु पर्छ ।

सुकेको छ जमिन् भने, डल्ला उठ्न सक्छ धेरै
जमेको छ पानी भने, तर्काएर जोत्नुपर्छ ।

रह्यो भने राँटो बिचमा, अर्को सियो बङ्ग्याएर
पल्ला छेउमा पुगेपछि, फर्काएर जोत्नुपर्छ ।

भन्नजस्तो सजिलो त, काम गर्दा काँ हुन्छर ?
हलोजुवा जस्तै शरिर, मर्काएर जोत्नु पर्छ ।

हह माले हह तारे, थर्काएर जोत्नु पर्छ
मङ्सिरको बाँझो पो त, चर्काएर जोत्नु पर्छ ।
नाङ्लेभारे ५ काठमाडौं
हाल : युएइ, दुबई