नेपाली हास्यव्यङ्ग्य अनलाइन पत्रिका

मेरो घरमा ‘सूर्य’
अस्ति पनि दिनभरि आयो
हिजो पनि दिनभरि आयो
आउँदा रित्तै आएन ‘सूर्य’
अँगालो भरी उज्यालो बोकेर आयो,
भित्र–बाहिर
तल–माथि चारैतिर
झलमल्ल उज्यालो फिँजायो ।

आउन त मेरा घरमा
हिजो साँझमा मिलिक्क
बिजुली पनि आयो
मुठ्ठीमा पोको पारेर
दुवै आँखालाई पनि नपुग्ने गरी
झिलिक्क उज्यालो पनि बोकेर ल्यायो,
अनि
हामी सबैलाई पिलिक्क हेर्दै –
जताबाट आयो–उतैतिर गयो,
रित थियो उसको यो–
त्यसैले–
किन आयो– मैले सोध्दै सोधिन !
किन गयो– मैले खोज्दै खोजिन !
तर–
भोलिपल्ट बिहान उज्यालो भयो
बिजुली त आउनै भ्याएन मेरो घरमा
बरु एकजना मान्छे पठायो
“म बिजुलीको मिटर रिडर हुँ” भन्दै,
रूपान्तरित हुँदै, सूर्यलाई पनि चुनौती दिँदै
तिर्नै नसकिने यति लामो बिल पो पठायो ।

झापा