नेपाली हास्यव्यङ्ग्य अनलाइन पत्रिका

१. धेरै भए
यहाँ,
नीतिभन्दा नेता धेरै भए ।
टाउकाभन्दा फेटा धेरै भए ।
पुस्तकभन्दा गाइड धेरै भए ।
प्राविधिकभन्दा साइड धेरै भए ।
अन्नभन्दा घुन धेरै भए ।
कानभन्दा सुन धेरै भए ।
गुनभन्दा बैगुन धेरै भए ।
त्यसैले,
जागिरभन्दा भनसुन धेरै भए ।

२. हराएको छ
हिजोआज,
गाउँबाट पर्म हराएको छ ।
सहरबाट सर्म हराएको छ ।
मूर्तिविनाका मन्दिरहरू
ङिच्च हाँसिरहेछन्
त्यसैले, प्रत्येकको छातीबाट विश्वासको
धर्म हराएको छ ।

३. बढाएको छ
देखासिकीले फेसन बढाएको छ,
राजनीतिले टेन्सन बढाएको छ ।
डाक्टरहरू सहर नछोड्ने भए
कम्पाउण्डरहरूको उपचारले
गाउँमा रोगको देसन बढाएको छ ।

मन्थली, रामेछाप