नेपाली हास्यव्यङ्ग्य अनलाइन पत्रिका

यतातिर टाल्न खोज्यो उता भ्वाङ पर्छ,
खै,यो नाथे जिन्दगीले के के गर्छ गर्छ ।

छोरो साह्रै बुद्धिमान छ मेरै गोत गयो,
पिंधबाट दुलो पार्छ माथिबाट भर्छ ।

चिन्नै गाह्रो श्रीमतीलाई मेरै पहिरन ला’छ !
पलाउँछ कि दाह्री पनि अब एउटै डर छ ।

अहिल्यैदेखि झुटो बोल्न खप्पिस छे छोरी,
के नजानोस् ! छिमेकैमा मन्त्रीज्यूको घर छ ।

क्या बलियो बालुवाको पुल बाँध्यो भाइले !
तर्छ अब निर्धक्कले त्यसले ’सागर’ तर्छ ।।