नेपाली हास्यव्यङ्ग्य अनलाइन पत्रिका

भाँचियो मकै अन्न भित्रियो
ढोडको भने काम सिद्धियो
भन्दछन् धनी यो उखल्नु छ
फेरि खप्खपी खेत रोप्नु छ ।।

ढोड ढोड हो के बुझोस् कुरो
भित्रको थियो भिन्न नै चुरो
ऊ यसै फुली दङ्ग मख्ख छ
मूल्यवान् हुँ मै यत्ति ठान्दछ ।।

आदिदेखिकै यो कथा चल्यो
ढोडले सबै सम्झना भुल्यो
फालिनेछ ऊ गै कता कता
भोलि सम्झला दुर्दशा व्यथा ।।

फेरि रोपिनेछन् यहाँ मकै
ढोड जन्मिनेछन् खुशी हुँदै
खेतका धनी लग्दछन् मकै
को बुझोस् कथा के भनूँ म खै ।।

काठमाडौं