नेपाली हास्यव्यङ्ग्य अनलाइन पत्रिका

रमेश खकुरेल :

हेरियो हेरियो स्वादले हेरियो
वर्ष धेरै यसै हेर्नमै फेरियो
आज जे लेखियो भोलि सो केरियो
जोसुकै होस् मुला खै कहाँ टेरियो ।।

हुन्छ भन्थे नयाँ हुन्छ नेपाल नै
हो भनी लागियो ठेल्नमै पेल्नमै
हो नयाँ नै भयो आज नेपाल यो
जो पुरानो थियो त्यो कहाँ गो गयो ।।

ने! भने फूर्तिले डाँठमा पक्रिए
कर्कलाझैं सिपाही यसै लत्रिए
डाँठ हातै रह्यो पाल उड्दै गयो
के नयाँ भन्दथें क्या छटा देखियो ।।

च्यातिएको छ सारी धुजामा धुजा
चाउरी देख्छु गाला मुजामा मुजा
दाँत झारी सके आँत खारी सके
आज नेपाल आमा सिंगारी सके ।।

शूर छन् वीर छन् बाघ छन् शेर छन्
एकभन्दा अरू सक्षमै धेर छन्
खण्डमा खण्ड छन् सण्ड उद्दण्ड छन्
गर्न सक्नेहरू यी सबै चण्ड छन् ।।

चाल देख्तै बुझें देश बन्ने भयो
बार्दली अर्दली नाम हट्ने भयो
नाम चढ्ने भयो भाउ बढ्ने भयो
विश्वले देश यो उच्च भन्ने भयो ।।

०००
कमलपाेखरी, काठमाडाैं