नेपाली हास्यव्यङ्ग्य अनलाइन पत्रिका

मुर्कट्टालाई टोपी
सुहाउँछ भने लगाओस्,
बाउबाजेभन्दा अघि
नाति जन्मिन्छन् भने जन्मियून् र,
हिँडून् खुट्टालाई टाउकाले टेकेर ।

आखिर समय–
बाङ्गोटिङ्गो रेखा न हो,
यो कहिले र कुन युगमा
सीधा खिचिएको छ र !?

भोलि गुरुत्व–
समयसापेक्ष नहुनसक्छ र,
खस्न सक्छन् न्युटनका स्याउ
जमिनबाट आकाशतिर,
बग्न सक्छन्– नदीनाला उकालोतिर,
हिमाल पग्लिँदा हिउँ बन्न सक्छ सागर ।

नाप्ने नै हो भने
स्वर्गको उचाइमा–
नर्कको गहिराइ छ,
त्यसैले–
होश ढलेर बेहोश होस्
नहोस् तल धर्ती,
माथि आकाश नहोस्
उभिनु परोस् शून्यमा
केही गनासो छैन–
हिरण्यको घरमा प्रल्हाद
नजन्मेको कहाँ हो र,
आखिर, जिन्दगीलाई उत्तर देखाउने
कम्पास सबैसँग छ ।