नेपाली हास्यव्यङ्ग्य अनलाइन पत्रिका

आफ्नै जस्तो लाग्दैन मन कसले कब्जा गर्यो !
मेरो मुटु मेरो धड्कन कसले कब्जा गर्यो !!

पर्खालसम्म पुग्नुहुन्छ अनि रुनुहुन्छ !
भन्नुस न बा, हाम्रो आँगन कसले कब्जा गर्यो ?

छोरीलाई फोन गर्छु हाइ ड्याडी भन्छे !
दर्शन ढोगको शिष्ट चलन कसले कब्जा गर्यो ?

देशको नक्शा नाप्छ अनि छोरो प्रश्न गर्छ !
साँघुरिंदै गा’छ झन्झन् कसले कब्जा गर्यो ?

आकाशतिरै हुन्छन् आँखा वृद्ध बा आमाका !
फर्किएन सन्तान यौवन कसले कब्जा गर्यो ?

ब्युँझिएर जसै छामें पानी पानी थिएँ !
सपनामा मेरो वदन कसले कब्जा गर्यो ?

हर प्रहरमा सुनामीको रौद्र रुप देख्छु !
’सागर’को सहिष्णुपन कसले कब्जा गर्यो ?