नेपाली हास्यव्यङ्ग्य अनलाइन पत्रिका

मेरा दाजुहरू
कोही युद्धमा गएर
कार्गिलमा लड्दैछन्
मेरा काकाहरू
कोही मलेसियाको रुखका हाँगा काट्न
अग्ला रुखहरूमा चढ्दैछन्
मेरा भतिजाहरू
मरुभूमिको तातो बालुमा सड्दैछन्
मेरा उमेरै नपुगेका भाइहरू
उमेर सच्याएर
विदेश जाने भिसा लिने लाइनमा
अघि बढ्दैछन् ।
तर मेरा साना नानीहरू भने
नेपालीहरूको बहादुरी बारेमा लेखिएको
स्वाभिमानी नेपालीहरूका बारेको
पाठ्यपुस्तक रटी रटी पढ्दैछन् ।

भद्रपुर, झापा