नेपाली हास्यव्यङ्ग्य अनलाइन पत्रिका

अहिले जताततै परिवर्तनको हावा बहिरहेको छ । परिवर्तनको खोजमा आधुनिक कोलम्बसहरू झिटीमिटी लिएर चक्कर लाइरहेका छन् । चारैतिर परिवर्तनै परिवर्तन । सबै कुरामा परिवर्तन आइसक्यो यहाँ । अब मान्छे मात्र परिवर्तन हुनु बाँकी छ । साँच्चै मान्छे परिवर्तन भए के हुन्छ होला, कस्तो हुन्छ होला ! यसै पनि मान्छेको चालचलन, आनीबानी, रहनसहन, मानसिकता अनि पहिरनमा समेत परिवर्तन आइसकेको छ । टाढ़ा किन जानु ? युवतीहरूको नाइटोले कुण्डल लाउन थालिसक्यो । पहिले बगरेको पसलमा झुण्ड्याइएका खसीका फिलाहरू बाहेक कसैको फिला हेर्ने सौभाग्य जुर्दैनथ्यो। अचेल ता बाटाभरि, टोटो रिक्शा जताततै डिजाइन-डिजाइनका फिलाहरू हाकाहाकी देख्न पाइन्छ । यसलाई परिवर्तन नभनेर के भन्नु ?

परिवर्तनको यो प्रतियोगितामा मान्छे परिवर्तन भएर संसारको सबैभन्दा डरलाग्दो जनावरको रूपमा परिणत हुनेछ । सर्वप्रथम, मान्छेको शरीर विस्तारै-विस्तारै परिवर्तन हुँदै जानेछ । टाउकोदेखि परिवर्तन हुँदै जानेछ- यो एउटा अनुमान मात्र । हाम्रो शरीरमा चिन्हको रूपमा रहेका जति पनि विशेषताहरू छन् ती नहुँदा पनि चल्छ । ती विशेषताहरू क्रमशः अदृश्य हुनेछन्, ती सबै निष्क्रिय मांसपेशी हुन् । ती विशेषताहरू कुनै कानमा, केही आँखाको डिलमा, केही नाकको टोड़्कामा । हामीलाई थाहै हुँदैन, यी सबै अदृश्य हुनेछन् । ठूलो प्रकारको परिवर्तन, आँखामा ठ्याक्कै लागिहाल्ने । ती हुन्- हात र खुट्टाका बूढ़ीऔँलीहरू रहने छैनन् । भविष्यमा नानीहरू बूढ़ीऔंलीबिनै जन्मिनेछन् । यसलाई ‘जेनेटिक परिवर्तन’ भनिन्छ ।

नदी किनारको डिल विस्तारै-विस्तारै धस्केजस्तो यो परिवर्तन पनि श्लो मोसनमा हुनेछ शरीरका धेर ठाउँमा अनिवार्य हुनुपर्ने रौं, केश, भुत्ला, छुसीहरू उम्रिने छैनन् । टाउको पनि चुच्चे बयरको दानाजस्तो हुनु बेर छैन ।

यो परिवर्तनले अरूलाई कोनि तर मोडर्न मेडिसिन, साइण्टिफिक सर्जरी, अर्गेन ट्रान्सप्लाण्ट, प्लास्टिक सर्जरीका डाक्टरहरू बढ़ी मात्रामा रमाउनेछन् । नाक तिखो तिखो पार्नोस् कि लाम्चिलो, सानु पार्नोस् कि ढ्याब्रे तपाईंको मर्जी । कान दुईवटा अलग-अलग भए पनि चल्छ । आँखा तिनिक-तिनिक पार्नोस् कि आँखाको नानीमा रङ्गीविरङ्गी पुतलीको नक्शा टाँस्नोस् तपाईंको मर्जी । घूँड़ाका दुईवटै पाङ्ग्रामा बलवियरिङ् फिट गर्नोस्, अर्काको कृत्रिम किडनी बोकेर हिँड़्नोस् । जिउमा आफ्नो भन्ने केही नभए पनि यो एउटा महापरिवर्तन हो…महापरिवर्तन ।

अचेल फेरि जेनेटिक कारीगरी शुरू भएको छ, ‘क्लोनिङ्’ को जमाना आइसकेको छ । तपाईंजस्तै एउटा अर्का मान्छे तपाईंकै जीवकोषबाट तयार हुनेछ । तपाईंलाई अचेल एकजोड़ी हातले पुग्दैन, यो एकजोड़ी हात अचेल यथेष्ट छैन, तपाईंलाई दुर्गामाताको जस्तो दशभुजा चाहिन्छ । नो प्रोब्लेम, अर्डर गर्नोस् तपाईंका दुइवटा हातकै वरिपरि अरू आठ-आठवटा हातहरू सजिलैसित थपिनेछन् । चाहियो भने रावणकोजस्तो टाउको पनि थप्नु सक्नुहुनेछ । के को लाज, यो जमानै ता परिवर्तनको जमाना हो । माई बोडी माई विश । मातृगर्भमा दश महिनासम्म अलि अलि गर्दै सन्तान निर्माण नहुँदा पनि चल्छ ।

अरे ! टेष्ट ट्यूबको जमाना छ भाइ… टेष्ट ट्यूबको जमाना । टेष्ट ट्यूब मात्रै हजूर ? अब भोलिको दिनमा बोतलमा, बयममा बच्चाहरू तयार हुनेछन् । छोरा चाहियो कि छोरी ? जे चाहिन्छ त्यही रेडिमेड पाइन्छ । किनभने यो परिवर्तनको जमाना हो ।

०००
जलपाईगुड़ी (भारत)