नेपाली हास्यव्यङ्ग्य अनलाइन पत्रिका

१. महान

अघि बढ्नेलाई पछार्नुस्, साथी महान भइन्छ ।
नीति-नियमलाई लछार्नुस्, साथी महान भइन्छ ।।
कलि युग हो, जे-जे गर्नुहुन्न, त्यही-त्यही गर्नुपर्छ ।
सदाचार र नैतिकता घसार्नुस्, साथी महान भइन्छ ।।

२.ठूलो

ठूलो हुनलाई भूँडी, सबैको भन्दा ठूलो हुनुपर्छ ।
काम नगरी, मात्र कुरा गरेर बूढो हुनुपर्छ ।।
ग्वाम्म पाए, झ्याम्म हामफाल्छन् रे सबैले ।
सबै सकिएको ज्यूँदो लाशको मूढो हुनुपर्छ ।।

३.नेता

मौका मिले देशलाई चुसी-चुसी खान्छन् हजुर ।
विकास गर्ने पैसालाई स्वीस बैंकमा लान्छन् हजुर ।।
जस्तो नाम उस्तै काम, इमान्दार त कति-कति ।
पहाडको पहिरो तराई पुग्दा, समृद्धि नै मान्छन् हजुर ।।

०००

स्याङ्जा