नेपाली हास्यव्यङ्ग्य अनलाइन पत्रिका

 गायत्री लम्साल :

आहा जनताको अमूल्य मतले किनेको
नागरिक एक्सप्रेस माने, ब्रेक लाउनै नपर्ने गाडी हो
विकास पोखेर छताछुल्ल पार्ने हिउँ पर्ने खाडी हो ।
बेकामको सभ्यताको झाडी नभन्नुहोला महाशय,
यो त भूमिहिनहरुलाई बाँकी नराखि बगाउने बाढी हो ॥

गोरेटो पछि बनाउँला अहिले स्वर्ण बाटोमा कुदाउने हो
जसले किन्यो उसैका आशा,भरोसा, विश्वास उडाउने हो ।
यात्रीले बार्गेनिङ् गरेर बढी भाडा दिए त के गरौँ ?
दिएको जति मात्र होइन, अझै बढी खान सक्ने तागत छ
जे भन्छ एक्सप्रेसले त्यही गरौँ महाशय, अरु कसको के लाग्छ ?

रोजगारको कुरा काट्ने कम्पनीमा मस्तले कुरा काट्नुहोस् ।
सकेको जति निर्धक्क बढाइचढाई छाँट्नुहोस्,
एक पटक फाटेको जिन्दगी फेरि पनि फाटिरहनुस्
आफैले किनेको विकास हो शरम नमानि चाटिरहनुस् ॥
एक्सप्रेस गाडी हो ढुक्कले पाँच वर्ष नन्‌स्टप चलिरहन्छ ।

जे जे गर्छ एक्सप्रेसले सबै थोकलाई विकास मान्नुहोस्‌
रोग,भोक,दुःख, पिडाको लौरोले आफूले आफैलाई हान्नुहोस् ।
बाँकी रहेका सबै ठाउँमा त्यही एक्सप्रेस गाडीलाई छान्नुहोस्‌
एक्सप्रेस भनेको अरु जस्तो हैन एक्सप्रेस हो काँधमै बोक्नुहोस्‌
कामकुरो केही बुझ्‌नु पर्दैन महाशय ताली चैँ मजाले ठोक्नुहोस् ॥

०००
स्याङ्जा