नेपाली हास्यव्यङ्ग्य अनलाइन पत्रिका

गायत्री लम्साल :

सरकारसँग सुन बारी छ हामीलाई के को पिर ?
नगद पैसाको भकारी छ हामीलाई के को पिर ?
पैसा कमाउने जागिर कसो नपाइएला र अब ?
व्रत बसौँ नुनतेल पारी छ हामीलाई के को पिर ?

पैसा भएपछि सबैथोक किन्न पाइन्छ साथी
कुन सरकार राम्रो भो त चिन्न पाइन्छ साथी ।
नेपाली हौँ ठूला कुरा सबै किन नपत्याउनु ?
विकास बोक्न मस्तसँग हिड्न पाइन्छ साथी ॥

कोषमा पैसा फलेपछि काट्न आउँछन् समाजसेवी
आफैले थुकेको थुक चाट्न आउँछन् समाजसेवी ।
इमान र नैतिकता जति सबै घुटुक्क निलिसकेपछि
अध्यक्ष त मै बन्छु भनी साट्न आउँछन् समाजसेवी ॥

०००
स्याङ्जा