नेपाली हास्यव्यङ्ग्य अनलाइन पत्रिका

जहिले पनि नेताले ने देश बिगारे भन्छौ
जाबो एउटा मन्त्री भाको कति आरिस गर्छौ ।
बिगारेको प्रमाण भए लौ त पेश गर
होइन भने तिम्रो बकबक आजै बन्द गर ।।

अर्को पटक चुनावमा सँगै गाउँ जाउँला
खसी काट्ने म छँदैछु सँगै बसी खाउँला ।
अहिले चाहिँ आनन्दले मन्त्री खान देऊ
बरु कतै हात लाग्ने भा ठाउँ देखाइदेऊ ।।

मेरो पछि लाग्यौ भने एकदिन तिमी पनि
आइपुग्छौ मेरै ठाउँमा यस्तै मन्त्री बनी ।
तिमी पनि मन्त्री बने म जस्तो नै हुन्छौ
जाबो एउटा मन्त्री खाको कति आरिस गर्छौ ।।

देशको हित आफैँ हुन्छ अहिले आफ्नो हित
मूर्ख तिमी किन बन्छौ मिल हामीसित ।
तिमी पनि पाएपछि आफ्नै भूँडी भर्छौ
हामी चाहिँ मन्त्री भाको कति आरिस गर्छौ ।।

०००
काठमाडौं