नेपाली हास्यव्यङ्ग्य अनलाइन पत्रिका

के तपाइँले थाहा पाउनु भयो ?
हाम्रो राष्ट्रियता त खतरामा परेछ,
देश त गम्भीर सङ्कटमा पो रहेछ,
देशमा विदेशी चलखेल बढेछ ।

पत्याउनुहोस् न,
मैले रेडियोमा सुनेको, टिभीमा देखेको
अस्थाई संविधानको कुरा भए म पनि पत्याउन्न थिएँ
स्थायी ठूलै जिम्मेवार नेताले नै भनेको ।

साँचै भनेको, राष्ट्रियता खतरामा छ अरे
देश गम्भीर अवस्थामा छ अरे
देशमा विदेशी चलखेल बढेको छ अरे
कसको नेतृत्वमा देश यो अवस्थामा पुगेको हो अरे ?

पाप धुरीबाट कराउँछ भन्थे,
नेताजी त रेडियो र टिभीबाट पो कराउँदै हुनुहुन्छ
जनतालाई साबिती बयान दिँदै हुनुहुन्छ
आफ्नो पुरुषार्थ भन्दै हुनुहुन्छ,
उपलब्धि गन्दै हुनुहुन्छ ।

कम काम गरेछन् त नेताले बिगत दुई दशकमा ?
यत्रो उपलब्धि ल्याउने नेतालाई
तपाइँ काम नगर्ने भन्नुहुन्छ ?

०००

बत्तिसपुतली, काठमाडौं

पहिलाेपटक प्रविष्ट भएकाे  मिति :  माघ १४, २०७०