नेपाली हास्यव्यङ्ग्य अनलाइन पत्रिका

स्वाभिमानी स्वभावको भेटिएन टौवा
कतै पनि सद्भावको देखिएन पौवा ।
प्रभावको हावा चर्को लागेको छ कतै
अभावको सगरमाथा देख्छु जताततै ।।

राजनीति हिजाडा झैँ भएको छ आज
घातमाथि अन्तर्घात समाजको माझ ।
गठबन्धन गरीगरी दल मासेका छन्
निर्दलीय विचारका नेता हाँसेका छन् ।।

योग्यतालाई पन्छाएर परिवार खोज्छन्
मतदाता मच्चिएर लौरोलाई रोज्छन् ।
सिद्धान्तका कट्टरले कटहर पाए
नीतिसिति नमान्नेले मतपत्र खाए ।।

राईफाँडो राजनीति, भद्रगोल भयो
मुलुकको मूलनीति पैसासँगै गयो ।
मूल सङ्लो नभएर धमिलियो खोला
कार्यकर्ता धमिलोमा थापेका छन् झोला ।।

झोलाभरि माछा बोक्ने चढेका छन् माथि
देश बोक्ने राष्ट्रप्रेमी कोही छैन साथी ।
मर्यादित मान्छेलाई लुकाउन थाले
हातोबिना जाँतोलाई घुमाउन थाले ।।

आएका छन् युवाहरू लौरो देखाउँदै
भ्रष्टाचारी नेताजीको ढाँड सेकाउँदै ।
युवा उठे लौरो पनि जित्न सक्ने भयो
दाइँ गर्ने बुढा गोरु टिक्ने दिन गयो ।।

हुन थाल्यो लौराको विकास
हुने भयो भ्रष्टको विनाश ।।

रानीबारी, काठमाडौं