नेपाली हास्यव्यङ्ग्य अनलाइन पत्रिका

तिम्रो नेता सीमानामा बसेर
भूकम्पले देश हल्लाएको बेला
घरबार ढलाएको बेला
आफ्नै देशलाई नाकाबन्दी गर्छ

मेरो नेता त्यही नाकाबन्दीको
विरोधमा जेहाद छेड्छ
क्रान्तिकारी भाषण गर्छ
अचम्मको राष्ट्रवादी बन्छ ।

तिम्रो राजनेता
मधेसको मसिहा बन्छ
उत्पीडन विरुद्ध आगो ओकल्छ
संविधानमा अझै विभेद छ भन्छ
अनि संविधान पोल्छ ।

मेरो नेता यो संविधान उत्कृष्ट भन्छ
अधिकार सम्पन्न छ भन्छ
र दीपावली गर्छ ।

हाम्रो/तिम्रो नेताले
जनतालाई मधेसी बनायो
पहाडे बनायो
जनजाति र दलित बनायो
दशनामी र खस आर्य बनायो
तर नेपाली कहिल्यै बनाएन !!

एक थान संविधान आउँदा
तिम्रो नेता ब्ल्याक आउट गर भन्छ
मेरो नेता दीपावली गर भन्छ
तिमी हामीलाई
सँगै बसेर छलफल गर भन्दैन !

तिम्रो/हाम्रो नेताका
अनेकौ रूप हुँदा रहेछन् !
पर्दा बाहिर एउटा
पर्दा बाहिर अर्कै
नेपथ्यमा अनेकौँ
नाटकको पटाक्षेप जस्तो
आफ्नो ताल छैन
आफ्नो चाल छैन
कठपुतली जस्तो !!

र हिजो आज
फेरि अर्को नाटकको पटाक्षेप भएको छ
ब्ल्याक आउट गर्न लगाउने
र दीपावली गर्न लगाउने
नाकाबन्दी गर्न लगाउने
र राष्ट्रवादी भनाउने
मधेसका मसिहा
र राष्ट्रवादका मसिहा
एकाएक एकाकार भएका छन्
अध्यादेशको बाढी ल्याएर
संविधान बगाउँदै छन् !!

हे हिमाली !
हे पहाडी !
हे मधेसी !
हो हामीलाई पहिचान चाहिन्छ
आत्मसम्मान चाहिन्छ
तर हामीलाई
हिमाल सहितको
पहाड सहितको
तराई मधेस सहितको
सिङ्गो देश भन्ने नेता चाहिन्छ
सबैको पहिचान सहितको संविधान चाहिन्छ
संविधान सँगै सद्भाव
अनि अखण्ड नेपाल चाहिन्छ !!

धादिङ