नेपाली हास्यव्यङ्ग्य अनलाइन पत्रिका

सर्वहारा मारा भए भकारीमा बस्ने
‘गाई मारी गधा पोस्ने’ दरबारमा पस्ने ।
कोही भए घुम्ने कुर्सी घुमाएर डस्ने
जनताको पसिनामा कमाएर कस्ने ।

किसानले खेती गर्न मल-बिउ खोज्छ
टाउकेले कमिसन खान मात्रै रोज्छ ।
ज्यानमारा अत्याचारी बचाउँछ कल्ले ?
कर्मनिष्ठ सदाचारी पन्छाउँछ जल्ले ।

घर पोली खरानीको थुप्रो बनाउँदै
बेच्नेहरू ठूला भए डुङ्ग गनाउँदै ।
भ्रष्टाचारी, दुराचारी छुटाउन थाले
सदाचारी सोझालाई कुटाउन थाले ।

तल-माथि खरानीको धोक्रो कमाउने
माथिमाथि पुगेका छन् खोक्रो बनाउने ।
यस्तो चाला चलाउने सर्वहारा मारा
भन्ने गर्थे खसाल्दिन्छु आकाशका तारा ।

जनताले भन्दैछन् किन ?
करमाथि कर तिर्न सकिन ।

नागार्जुन न.पा.-१, रानीवन, काठमाडौँ
९८४१४९१०८१