नेपाली हास्यव्यङ्ग्य अनलाइन पत्रिका

एकबार मरिदिउँ मरिदिउँ लाग्छ
फेरि माया लाग्छ त्यी अनुहारहरूको
जो म मरेको दिन मलाई
संसारकै सबैभन्दा उत्तम प्राणि बनाउँछन्
तिनीहरूको मुख कसरी हेरुँला भनेर

म नमरी राम्रो हुनै सक्दिन
म मर्नासाथ
एकाएक
संसार उत्तानो पर्छ

मेरो दुस्मन कोकोहोलो गर्छ
संसारको सबैभन्दा जाति मन्छे गुमाएँ भन्छ
जसले मलाई कहिले बाङ्गो आँखाले हेर्न सकेन
उसले मेरा नाममा
सिधा आँखा भरी आँसु जन्माउँछ

म मर्नु पर्छ ज्ञानी हुन्
म मर्नु पर्छ दानी हुन
म मर्नु पर्छ आँखामा बस्न
म मर्नु पर्छ मुटुमा पस्न
त्यसैले
एकबार मरिदिउँ मरिदिउँ झ्वाँक चल्छ
फेरि मयाँ लाग्छ त्यी अनुहारहरूको
यदि म फर्कें भने
कसरी हेरुँला त्यी मयालु मुहारहरू
जो मलाई नरोत्तम बनाउन
हरोत्तम प्रयासरत रहन्छन्
जत्ति रहर मलाई मयाँ पाउने छ
त्यत्ति मयाँ मलाई त्यी आत्माहरूको लाग्छ
जो म मरिहालें भने
मलाई
नरोत्तम बनाउन
हरोत्तम प्रयासमा रहनेछन् ।

०००