नेपाली हास्यव्यङ्ग्य अनलाइन पत्रिका

१।
व्यर्थको गफ खोकेरै दिन बित्छ कसैको
हातले टेबल ठोकेरै दिन बित्छ कसैको
यी दिन, यी रात, कति आए, कति गए,
अधूरा आशा बोकेरै दिन बित्छ कसैको ।

२।
तिमीलाई बेठिक लागेको चीज मलाई ठिक लाग्न सक्छ
तिमी जसलाई टाढा भन्दछौ, मलाई नजिक लाग्न सक्छ
यी असमानताले गर्दा सहमति जनाउन सक्दिनँ महोदय !
तिमीले सामान्य ठानेको, मलाई अलौकिक लाग्न सक्छ ।

३।
म कर्ममा विश्वास गर्छु, भाग्य लेखान्तको कुरा नगर्नुुस्
म पसिनालाई पूजा गर्छु, ईश्वरीय दृष्टान्तको कुरा नगर्नुस्
मेरो मनको इजलासले दिएको निर्णय ठिक लाग्छ मलाई
बिन्ती यो अल्छिलाग्दा विचार सिद्धान्तको कुरा नगर्नुस् ।

४।
मन मिल्नेसँग मनकै, साइनो गाँस्न पाइयोस्
दुःख बिर्सिएर एकैछिन मीठो हाँस्न पाइयोस्
अव्यक्त मनका भावनालाई मनभित्रै सङ्गालेर
हृदयका भित्ताभरि सुनौला पल टाँस्न पाइयोस् ।

५।
आरनभित्र पगालेर विचार र बिम्ब अर्जाप्दै छु
आत्म विश्वासको धारा खोली घैलामा थाप्दै छु
नयाँ लक्ष्य स्वर्णिम गन्तव्य अब बल्ल सुरु भयो
परिवर्तनका यी बाटोहरू सङ्घर्षले नाप्दै छु ।

०००
काठमाडौं