नेपाली हास्यव्यङ्ग्य अनलाइन पत्रिका

ज्ञानुवाकर पाैडेल :

(१)
अहो प्रभु ! दिउँसै कस्तो यो भयावह रात देख्नु परिरहेछ
न्याय माग्दा निर्दोष जनता भएको हताहत देख्नु परिरहेछ
मत-पत्रलाई देश लुट्ने लाइसेन्स ठान्नेहरूकै कारण –
सुन्दर मुलुक यो हाम्रो हुन पुगेको बरवाद देख्नु परिरहेछ ।

(२)
उज्यालो अझै यो देशमा नआउने भएपछि
काव्य-रस मीठो पिउन नपाउने भएपछि
रमाइलोसंग के बित्ला र अब यो जीवन
चरा-चुरूंड्॰गीले यहां नचिर्बिराउने भएपछि ।

(३)
गर्नु नगर्नु सारै नकाम पो गरियो यो जीवनमा
निस्तो सपना मात्र पो देखियो यो जीवनमा
के के न पाइएला भनि पहाड जो खनेंथें मैले-
जाबो त्यो सानो मुसा पो भेटियो यो जीवनमा ।

०००
काठमाडाैं