नेपाली हास्यव्यङ्ग्य अनलाइन पत्रिका

रेहित सैजु :

१.
स्थिरताको दियो बाल्ने नायक चाहिएको छ
समान हक अधिकार विधायक चाहिएको छ
अहिलेको आवश्यकता केवल यत्ति हो हजुर,
एकताको गीत गाउने गायक चाहिएको छ ।

२.
मनपरी उपद्रो गर्नलाई खुब जान्नु पर्ने रै’छ
छक्याएर जनलाई आफूतिर तान्नु पर्ने रै’छ
नेता बन्छु भनियो तर अहँ सिद्धान्त पुगेन,
गाईलाई गधा, गधालाई गाई मान्नु पर्ने रै’छ ।

३.
तिम्रो फुर्ती तिम्रो धाक पानीको फोका जस्तै देखेँ
तिम्रा ती विचार बलि चढाएको बोका जस्तै देखेँ
के धरौटी राखेका छौ र, तिम्रो विश्वासमा पर्नु अब ?
वास्तवमा तिमी त फाल्न लागेको पोका जस्तै देखेँ ।

०००
रामेछाप