नेपाली हास्यव्यङ्ग्य अनलाइन पत्रिका

चुनावअघि
यी भान्छामा पुग्छन्
यी गोठ खलियामा पुग्छन्
यिनले ढोग्छन्
यिनले आशिर्वाद माग्दै
शिर झुकाउछन्
नभए हात आफैं समाएर
आफ्नो शिरमा थोपर्छन्
भैंसी दुहिदिन्छन्
खेत जोतिदिन्छन्
डल्ला फोरिदिन्छन्
चुनाव जित्नुपर्छ
बिस्तारै यिनको बोली फेरिन्छ
बा ख्याल छ तपाईंलाई
चुनावअघि र चुनावपछि
यिनको नमस्कार फेरिन्छ

यिनको काम माग्ने हो
यिनले मागेर खाने हो
पहिले भोट खान्छन्
बिस्तारै भरोशा खान्छन्
त्यसपछि सपना खान्छन्
अनि देश नै
खाउँला खाउँला जस्तो गर्छन्
हामी दर्शक हौं
भोट तिरेर तमासा हेरिन्छ
बा ख्याल गर्नुस् नपत्याए
चुनावअघि र चुनावपछि
यिनको तमासा फेरिन्छ

यिनले जित्न मात्र पर्छ
हिजो हात समाई समाई
आफ्नो टाउकोमा थोपर्नेलाई चिन्दैनन्
हिजो बिन्ति गर्दै हिँडेको
गाउँको बाटो हिन्दैनन्
कहिल्यै भोट नदिने
कहिल्यै गाउँ नछिर्ने
दलाल, ठगहरूबाट घेरिन्छन्
यो साँचो हो बा
चुनावअघि र चुनावपछि
यिनको आशिर्वाद लिने हात फेरिन्छन्

यी जादुगर हुन्
चुनाव जादु हो
हामी दर्शक हौं
हामीले भोट तिरेर जादु हेर्छौं
यी झ्याप झ्याप फेरिन्छन्
हाम्रो पात्रो फेरिन्छ
बुद्धि फेरिन्न
चुनाव फेरिन्छ
भोट फेरिन्न
आश फेरिन्छ
आँसु फेरिन्न ।

०००
काठमाडौं