नेपाली हास्यव्यङ्ग्य अनलाइन पत्रिका

मेरो राष्ट्रवाद साउनको भेल होइन
हिउँदको खहरे होइन
बेमौसमी बाजा होइन ।

मेरो राष्ट्रवाद
चुनाब जित्ने खेल होइन
बिरोधी झुक्याउने झेल होइन
आफ्नो नालायकी ढाक्नलाई
देशप्रेमको ढोल पिट्ने धुर्त नेताको भाषण होइन
स्वार्थीहरूको जालोमा ईमान फसेको
कथामा बन्ने फिल्मी सिक्वेल होइन ।

मेरो राष्ट्रवादको
कुनै ऋतु छैन
यसले कहिलै रङ फेर्दैन
आफ्नो स्वार्थको भाँडो भर्न
कसैको आशिर्वादको भर पर्दैन
मेरो राष्ट्रवादलाई
कसैको भजन गाउनु छैन
छिमेकीको दैलो धाउनु छैन
सुन बग्ने खोला बालुवाको दाममा बेच्ने
सकुनीहरुसँग मित लाउनु छैन ।

मेरो राष्ट्रवादमा
मेरा कर्मठ हातका पसिनाको गन्ध छ
मेरी जननीको मौलिक लयको छन्द छ
भाषणबाजी र सस्ता नाराको चैते बतास होइन
समर्पण र सहअस्तित्वको बसन्त छ ।

०००