नेपाली हास्यव्यङ्ग्य अनलाइन पत्रिका

करोडका चलखेल चलेका छन् बडा
चलखेल चपाउने कोही छैनन् खडा ।
नेताहरू भएका छन् साँढेजस्तै छाडा
जनताको निम्ति भए नेताहरू काँडा ॥

टाउकेहरू मिलेका छन् निलेका छन् सारा
सर्वहारा भन्नेहरू भए भातमारा ।
चुनाउमा भन्ने गर्छन्, खसाल्दिन्छु तारा
जितेपछि उनै हुन्छन् अजिङ्गरे दाह्रा ॥

बस्नखानै छैन ऐले महँगीमा पर्दा
चिन्ता छैन कसैलाई आत्महत्या गर्दा ।
प्रेम मरे, ठगिएका सोझासिधा मरे
मुलुक नै मार्नेहरू मार्न अघिसरे ॥

बन्चराले हाने मात्र जानेजस्तो गर्छन्
अलिकति निको भए केके गर्छन्-गर्छन् ।
मुलुक र जनताको चिन्ता छैन केही
आफू मात्र मोटाउने धन्दा गर्छन् त्यही ॥

सधैँभरि भोगियो औँसी
जल्लाई दियो त्यै हुने कुवंशी ॥

०००
२०७९ चैत, २९
मध्यनेपाल न.पा.-१, जिता, लमजुङ
९८४१४९१०८१