नेपाली हास्यव्यङ्ग्य अनलाइन पत्रिका

प्रह्लाद पोख्रेल :

१
बोकी जीवन घन्किँदा घरघरै जीवन्त लाग्ने स्वर
भाषा-भाष्कर भानुको उदयमा वाणी बन्यो उर्वर
आफ्नै मौलिकता थियो सँगसँगै अध्यात्मको चिन्तन
भाषा-जागृति जुर्मुराहट भई ज्यादै रमायो मन

२
रच्दा भाषिक एकतासित जहाँ स्वाधीनताको जग
ढाकी सुन्दर सिर्जना-कुसुमले धर्ती बन्यो जग्मग
हो रामायण रामको प्रियकथा आदर्शको सम्बल
जल्ले जीवनमा दियो प्रतिपला जीवन्त बन्ने बल

३
भ्रष्टाचार कलङ्क हो अनि ढिलासुस्ती नगर्नू भनी
लेखी व्यङ्ग्य विनोदपूर्ण रचना बानी सुधार्‍यो पनि
नेपाली लय-भाव-शब्द सजिने पस्की मिठा व्यञ्जना
झुल्केथे सहसा मिठा सरसिला सद्व्यङ्ग्यका चेतना

४
पाएथे जनले जहाँ सरलता आत्मीय सद्भावना
नेपाली जनजिन्दगी उजिलिने आस्वादिला सिर्जना
सोही सिर्जनशील जीवनकथा सम्झेर आजीवन
नेपाली जन गौरवान्वित भई पाए नयाँ जीवन

५
जल्ले जागृत भावना समयको शिक्षा वधूमा दियो
माला जप्न भनेर भक्तजनमा प्रश्नोत्तरी सुम्पियो
भाषाको मधुगीतमा समयको घन्क्यो मिठो बाँसुरी
घन्केको स्वरमा नयाँ लय भरी हामी थपौँ माधुरी

६
हे रामायणकार ! मूर्त रचना रच्ने कलाकार हे !
नेपाली जनभावनाप्रिय कवि ! प्यारा जनाधार हे !
गर्दा सिर्जनशील भै जनमुखी साहित्यको थालनी
तिम्रै शाश्वत चेतनासित रमी चम्किन्छ यो लेखनी

७
जस्तो जागृतिपूर्ण चेतनमुखी शिक्षा दियौ शाश्वत
भाषा-भक्ति र आत्मनिर्भरपना सम्पूर्ण जाग्ने स्वतः
भाषाको चरमा बनोस् घर दरो अस्तित्वशाली बनी
भाषा-सेवक भानु ! छौ हृदयमा साहित्य सञ्जीवनी ।
जय भानु !

०००
काठमाडाैं